ভাৰতত মোবাইলৰ সুৰক্ষা শক্তিশালী কৰাৰ লগতে অনলাইন জালিয়াতি ৰোধৰ বাবে দূৰসংযোগ বিভাগে জাৰি কৰিছে এক নতুন নিৰ্দেশনা। এই নিৰ্দেশনাৰ অধীনত ভাৰতত নিৰ্মিত বা বহিঃৰাজ্যৰ পৰা আমদানি কৰা প্ৰতিটো নতুন স্মাৰ্টফোন এতিয়া সঞ্চাৰ সাথী এপৰ সৈতে প্ৰি-ইনষ্টল কৰা হ’ব। সকলো মোবাইল নিৰ্মাতা আৰু আমদানিকাৰকক এই নিৰ্দেশনা অনতিপলমে কাৰ্যকৰী কৰিবলৈ কোৱা হৈছে।
সঞ্চাৰ সাথী এপটোৱে মোবাইল ব্যৱহাৰকাৰীক সুৰক্ষা প্ৰদান কৰে। যদি কোনো ফোন হেৰাই যায় বা চুৰি হয়, তেন্তে মিনিটৰ ভিতৰতে ৰিপৰ্ট আৰু ব্লক কৰা হ’ব পাৰে। ইয়াৰ উপৰিও ই মোবাইল ফোনত ভুৱা লিংক, স্পেম কল, সন্দেহজনক বাৰ্তা, আৰু চলি থকা সংযোগসমূহ নিৰীক্ষণ কৰাত সহায় কৰে। এপটোৰ বিশেষ বৈশিষ্ট্য হ’ল ব্যৱহাৰকাৰীয়ে আৰু IMEI নম্বৰ মনত ৰখাৰ অসুবিধাৰ সন্মুখীন হ’ব নালাগে।
এই এপটোৱে সমগ্ৰ দেশৰ লাখ লাখ লোকক মোবাইল সুৰক্ষা সেৱা আগবঢ়াইছে। লাখ লাখ ফোন ব্লক কৰি বৃহৎ সংখ্যক চুৰি হোৱা মোবাইল ফোনৰ স্থানৰ সন্ধান উলিয়াবলৈ সক্ষম হৈছে। ইতিমধ্যে লাখ লাখ ব্যৱহাৰকাৰীয়ে এই প্লেটফৰ্মত নিজৰ নামত চলি থকা মোবাইল সংযোগ পৰীক্ষা কৰি বহু প্ৰৱঞ্চনামূলক কাৰ্যকলাপ ৰোধ কৰিছে। প্লে ষ্ট’ৰ আৰু এপ ষ্ট’ৰত ইয়াৰ ডাউনলোড ক্ৰমাগতভাৱে বৃদ্ধি পাইছে, যিয়ে ইয়াৰ নিৰ্ভৰযোগ্যতা আৰু জনপ্ৰিয়তাক প্ৰতিফলিত কৰিছে।
চৰকাৰে স্পষ্ট কৰি দিছে যে এতিয়া নিৰ্মিত সকলো মোবাইল ফোনত সঞ্চাৰ সাথী প্ৰি-ইনষ্টল কৰিব লাগিব, আৰু এই এপটো ফোনটোৰ পৰা আঁতৰাই বা নিষ্ক্ৰিয় কৰিব নোৱাৰিব। আনকি পুৰণি ষ্টক ফোনসমূহতো চফটৱেৰ আপডেটৰ জৰিয়তে এই এপটো অন্তৰ্ভুক্ত কৰিব লাগিব। এপল, চেমচাং, অ’প’, ভিভ’, আৰু ছাইঅ’মিৰ দৰে কোম্পানীয়ে ৯০ দিনৰ ভিতৰত এই আদেশ মানি চলি ১২০ দিনৰ ভিতৰত চৰকাৰক প্ৰতিবেদন দাখিল কৰিব লাগিব।
