সুপ্ৰভাত। দিনটোৰ আৰম্ভণিতেই কেইটামান গুৰুত্বপূৰ্ণ খবৰেৰে আৰম্ভ কৰিছো ৰাতিপুৱাৰ এই শিতানটো।
জুবিন গাৰ্গৰ গান বিকৃত কৰাৰ ফল পালে মৰ্মিতা মিত্ৰই। জিলাই জিলাই বাতিল কৰা হৈছে মৰ্মিতা মিত্ৰৰ বিহুৰ অনুষ্ঠান। কেইবাটাও দল-সংগঠনে দাখিল কৰিছে এজাহাৰ। গুৱাহাটীৰ দিছপুৰ থানাত মৰ্মিতাৰ বিৰুদ্ধে দাখিল কৰা হৈছে দুখনকৈ এজাহাৰ। বিহুত যাতে মৰ্মিতাই কোনো অনুষ্ঠান পৰিৱেশন কৰিব নোৱাৰে তাৰ ব্যৱস্থা কৰাৰ দাবী উত্থাপন কৰিছে একাংশই। গোলাঘাট, শিৱসাগৰ, উত্তৰ গুৱাহাটী, টিহু, গুৱাহাটী, কাজিৰঙা, তিনিচুকীয়া, ৰঙিয়াত বাতিল মৰ্মিতাৰ সাংস্কৃতিক অনুষ্ঠান।
ফেমিনা মিছ ইণ্ডিয়া ৱৰ্ল্ড-২০২৬ৰ খিতাপ জয় গোৱাৰ সাধৱী সতীশ চেইলৰ। ভূৱনেশ্বৰৰ KIIT বিশ্ববিদ্যালয়ত অনুষ্ঠিত ৬১তম ফেমিনা মিছ ইণ্ডিয়া ৱৰ্ল্ড ২০২৬ৰ খিতাপ দখল কৰে সাধৱী সতীশ চেইলে। এই প্ৰতিযোগিতাত মহাৰাষ্ট্ৰৰ ৰাজনন্দিনী পাৱাৰ প্ৰথম ৰানাৰ-আপ আৰু কেন্দ্ৰীয় শাসিত অঞ্চলৰ শ্ৰী অদ্বেতা দ্বিতীয় ৰানাৰ-আপ হিচাপে নিৰ্বাচিত হয়।
ভুৱা ভোটাৰ নাইকিয়া কৰিবলৈ কঠোৰ হৈছে উচ্চতম ন্যায়ালয়। ভোটকেন্দ্ৰত ৰিগিং বন্ধ কৰিবলৈ আহি আছে কঠোৰ আইন। ভোটদানৰ পূৰ্বে বায়োমেট্ৰিকযোগে ভোটাৰক চিনাক্তকৰণৰ বাবে আৱেদন ন্যায়াধীশ অশ্বিনী কুমাৰ উপাধ্যায়ে।নিৰ্বাচন চলি থকা ৫ ৰাজ্যত বায়োমেট্ৰিকৰ জৰিয়তে ভোটাৰৰ চিনাক্তকৰণৰ বাবে দাবী আৱেদনত কৰা হৈছে।
হৰমুজত ভাৰতৰ ২খন তেলৰ টেংকাৰক লক্ষ্য কৰি গুলীচালনা ইৰানৰ। ইৰাকৰ পৰা তেল কঢ়িয়াই অনা অৰ্ণৱ আৰু ছানমাৰ হেৰাল্ডক লক্ষ্য কৰি গুলীচালনা সংঘটিত হয়।এই ঘটনাৰ পিছতে দিল্লীৰ পৰা ইৰানৰ ৰাষ্ট্ৰদূতক চমন জাৰি কৰা হয়। ইফালে ভাৰতত থকা ইৰানৰ প্ৰতিনিধি ডা০ আব্দুল মজিদ হকীম ইলাহীয়ে কয় যে, ভাৰত আৰু ইৰানৰ সম্পৰ্ক ৫০০০ বছৰ পুৰণি, ইৰানে কেতিয়াও যুদ্ধ বিচৰা নাই।আলোচনাৰ মাধ্যমেৰে দুয়োখন দেশে সমস্যাৰ সমাধান কৰিব বুলি মন্তব্য কৰে তেওঁ।
