ইছলামবাদ ২.০ৰ আলোচনাক লৈ এতিয়াও ৰহস্যৰ আৱৰ্তত আছে। প্ৰথমে ২১ এপ্ৰিলত অনুষ্ঠিত হ’বলগীয়া শান্তি আলোচনাৰ বৈঠকখন পিছুৱাই দিয়াৰ জল্পনা-কল্পনা কৰা হৈছে। কিন্তু ইৰাণৰ পৰা পৰস্পৰ বিৰোধী সংকেত ওলাইছে।
একাংশ সাংসদে আমেৰিকাৰ সৈতে হোৱা আলোচনাৰ বাতৰিক সম্পূৰ্ণ মিছা বুলি উল্লেখ কৰিছে। ইফালে, যুদ্ধবিৰতি শেষ হ’লে ইৰাণত বোমা বিস্ফোৰণ কৰা হ’ব বুলি সকীয়াই দি আমেৰিকাৰ ৰাষ্ট্ৰপতি ড’নাল্ড ট্ৰাম্পে পুনৰবাৰ কঠোৰ স্থিতি গ্ৰহণ কৰিছে।
অৱশ্যে ট্ৰাম্পে লগতে উল্লেখ কৰে যে, যদি ইৰাণে ইছলামবাদত আলোচনালৈ আহে আৰু এই আলোচনাত সফল হয়, তেন্তে তেওঁ ইৰাণৰ নেতাসকলৰ সৈতেও সাক্ষাৎ কৰিব পাৰে।
ইফালে সমগ্ৰ বিষয়টোত এতিয়ালৈকে মধ্যস্থতাকাৰী ভূমিকা গ্ৰহণৰ চেষ্টা কৰা পাকিস্তানে এতিয়া মুকলিকৈ চীনৰ প্ৰতি আস্থা প্ৰকাশ কৰিছে। পাকিস্তানৰ বৈদেশিক মন্ত্ৰালয়ৰ তথ্য অনুসৰি, ইছাকদাৰৰ সৈতে হোৱা বৈঠকত জিয়াং জাইডঙে আমেৰিকা-ইৰাণৰ শান্তি প্ৰচেষ্টাত পাকিস্তানৰ ভূমিকাক প্ৰশংসা কৰে। দুয়োখন দেশে চীন-পাকিস্তানৰ “চিৰসেউজ” অংশীদাৰিত্ব আৰু অধিক শক্তিশালী কৰাৰ ওপৰতো গুৰুত্ব আৰোপ কৰে।
আনহাতে ইউৰোপেও সক্ৰিয় স্থিতি গ্ৰহণ কৰা যেন অনুভূত হয়। জাৰ্মানীৰ বৈদেশিক মন্ত্ৰী জোহান ৱাডেফুলে ইৰাণক ইছলামবাদৰ আলোচনাৰ প্ৰস্তাৱ গ্ৰহণ কৰি জনসাধাৰণৰ স্বাৰ্থত কূটনৈতিক পথ বাছি ল’বলৈ আহ্বান জনাইছে। ব্ৰাছেলছত ইউৰোপীয় বৈদেশিক মন্ত্ৰীসকলৰ বৈঠকৰ পূৰ্বে তেওঁ কয় যে, এই সুযোগ হেৰুৱালে ইৰাণৰ বাবে ই ক্ষতিকাৰক হৈ উঠিব পাৰে।
এই উত্তেজনাৰ মাজতে ইৰাণৰ ভিতৰৰ পৰিস্থিতিও উদ্বেগজনক হৈয়ে আছে। ইণ্টাৰনেট নিৰীক্ষণ সংস্থা নেটব্লকছৰ তথ্য অনুসৰি বিগত ৫৩ দিন ধৰি দেশত ব্যাপক ইণ্টাৰনেট নিষেধাজ্ঞাৰ ব্যৱস্থা কৰা হৈছে। চৰকাৰে “স্তৰীয় ব্যৱস্থা” ৰূপায়ণ কৰিছে, যাৰ ফলত সীমিত সংখ্যক ব্যক্তি আৰু প্ৰতিষ্ঠানেহে ইণ্টাৰনেট ব্যৱহাৰ কৰিব পাৰে, আনহাতে সাধাৰণ জনতা বিশ্বব্যাপী ইণ্টাৰনেটৰ পৰা প্ৰায় সম্পূৰ্ণৰূপে বিচ্ছিন্ন হৈ পৰিছে।
ইয়াৰ ফলত স্বাভাৱিক জীৱনত ব্যাঘাত জন্মোৱাই নহয় ব্যৱসায় আৰু অৰ্থনীতিতো ভয়াৱহ প্ৰভাৱ পৰিছে। কূটনৈতিক প্ৰচেষ্টা অব্যাহত থকাৰ সময়তে ভাবুকি, অনাস্থা আৰু আভ্যন্তৰীণ হেঁচাই অঞ্চলটোক আৰু অধিক অস্থিৰ কৰি তুলিছে।
