বিদ্যালয়ৰ পিছতে পশ্চিম বংগ চৰকাৰে এতিয়া ৰাজ্যখনৰ সকলো মাদ্ৰাছাতে প্ৰাৰ্থনাৰ সময়ত “বন্দে মাতৰম” গোৱাটো বাধ্যতামূলক কৰিছে। চৰকাৰে এই নিৰ্দেশ বলবৎ কৰি এক অধিসূচনা জাৰি কৰে। এই নিয়ম সকলো চৰকাৰী সাহায্যপ্ৰাপ্ত আৰু বেচৰকাৰী মাদ্ৰাছাৰ ক্ষেত্ৰত প্ৰযোজ্য হ’ব। আদেশ অনুসৰি প্ৰাৰ্থনাৰ মাদ্ৰাছাৰ সময়ত সকলোৱে “বন্দে মাতৰম” গাব লাগিব। সকলো মাদ্ৰাছাতে এই নিয়ম হ’ব বাধ্যতামূলক।
এই সন্দৰ্ভত পশ্চিম বংগ মাদ্ৰাছা শিক্ষা সঞ্চালকালয়ে এক নিৰ্দেশ জাৰি কৰিছে। চৰকাৰী আদেশত স্পষ্টকৈ কোৱা হৈছে যে পূৰ্বৰ সকলো নিয়ম আৰু প্ৰথাক অতিক্ৰম কৰি এই নতুন নিয়ম তাৎক্ষণিকভাৱে কাৰ্যকৰী কৰা হৈছে। ইয়াৰ পৰিসৰত সকলো চৰকাৰী আৰ্হি মাদ্ৰাছা (ইংৰাজী মাধ্যম), স্বীকৃতিপ্ৰাপ্ত সাহায্যপ্ৰাপ্ত মাদ্ৰাছা, অনুমোদিত মাদ্ৰাছা শিক্ষা কেন্দ্ৰ, শিশু শিক্ষা কেন্দ্ৰ, সংখ্যালঘু পৰিক্ৰমা আৰু মাদ্ৰাছা শিক্ষা বিভাগৰ অধীনত স্বীকৃতিপ্ৰাপ্ত অসহায়ক মাদ্ৰাছা আদি অন্তৰ্ভুক্ত হ’ব।
ইয়াৰ পূৰ্বে ১৩ মে’ৰ সন্ধিয়া পশ্চিম বংগ শিক্ষা বিভাগেও ৰাজ্যৰ সকলো চৰকাৰী বিদ্যালয়তে ‘বন্দে মাতৰম’ গোৱাটো বাধ্যতামূলক কৰি এক অধিসূচনা জাৰি কৰে। ৰাজ্যখনৰ নতুন আৰু নৱম মুখ্যমন্ত্ৰী শুভেন্দু অধিকাৰীয়ে ১৪ মে’ত নিজৰ চৰকাৰী ছ’চিয়েল মিডিয়া একাউণ্টত শিক্ষা বিভাগৰ জাননী শ্বেয়াৰ কৰিছিল।
অতিৰিক্ত মুখ্য সচিবে জাৰি কৰা অধিসূচনাখনত উল্লেখ কৰা হৈছে যে, পশ্চিম বংগ চৰকাৰে বিদ্যালয় শিক্ষা বিভাগৰ অধীনৰ সকলো বিদ্যালয়তে পাঠ্যক্ৰম আৰম্ভ হোৱাৰ পূৰ্বে প্ৰাৰ্থনা সভাৰ সময়ত ‘বন্দে মাতৰম’ জাতীয় সংগীত গোৱাটো বাধ্যতামূলক কৰিছে।
