বুধবাৰে নেপালৰ সূৰ্য্যচৌৰত এখন হেলিকপ্টাৰ দুৰ্ঘটনাত পতিত হৈছে। এই হেলিকপ্টাৰ দুৰ্ঘটনাটোত চাৰিজন চীনা নাগৰিক আৰু এজন পাইলটৰ মৃত্যু হয়।
হেলিকপ্টাৰখনে দুপৰীয়া ১:৫৪ বজাত উৰা মাৰিছিল আৰু ইয়াৰ ঠিক তিনি মিনিট পিছতে হেলিকপ্টাৰখনে বিমান পৰিবহণ নিয়ন্ত্ৰণৰ সৈতে সংযোগ বিচ্ছিন্ন হয়।
‘মাই ৰিপাব্লিকা’ কাকতৰ বাতৰি অনুসৰি নুৱাকোটৰ শিৱপুৰী গ্ৰাম্য পৌৰসভাৰ সাত নম্বৰ ৱাৰ্ডৰ দুৰ্ঘটনাস্থলীৰ পৰা আৰক্ষীয়ে ৫টা মৃতদেহ উদ্ধাৰ কৰিছে।
দুৰ্ঘটনাৰ সময়ত কাঠমাণ্ডুৰ পৰা ৰাছুৱালৈ গৈ আছিল ‘এয়াৰ ডাইনেষ্টী হেলিকপ্টাৰ, ৯এন-এজেডি’। দুপৰীয়া ১:৫৪ বজাত কাঠমাণ্ডুৰ পৰা উৰা মাৰিছিল যদিও উৰণৰ তিনি মিনিটৰ পিছতে হেলিকপ্টাৰখনে যোগাযোগ হেৰুৱাই পেলায়।
আৰক্ষী বিষয়াৰ উদ্ধৃতি দি বাতৰি কাকতখনে কয় যে দুৰ্ঘটনাস্থলীৰ পৰা দুজন পুৰুষ, এগৰাকী মহিলা আৰু পাইলটৰ মৃতদেহ উদ্ধাৰ কৰা হৈছে। ইয়াত কোৱা হৈছে যে ইয়াৰে এটা মৃতদেহ বেয়াকৈ জ্বলি যোৱাৰ বাবে এতিয়াও চিনাক্ত হোৱা নাই।
উল্লেখ্য যে, যোৱা মাহ অৰ্থাত ২৪ জুলাইত নেপালৰ ৰাজধানী কাঠমাণ্ডুত এনে এক বিমান দুৰ্ঘটনা সংঘটিত হৈছিল য’ত ১৮ জন লোকৰ মৃত্যু হৈছিল।
