আমেৰিকা আৰু ইৰাণৰ মাজত চলি থকা শান্তি আলোচনাৰ মাজতে উপসাগৰীয় অঞ্চলত পুনৰ বৃদ্ধি পাইছে উত্তেজনা। ২৯ মে’ৰ পুৱাই ইৰাণৰ উপকূলীয় প্ৰদেশ বুশ্বেহৰ আৰু হৰমুজ জলদ্বীপত বিস্ফোৰণৰ শব্দ শুনা যায়। ইৰাণৰ সংবাদ মাধ্যমে দাবী কৰিছে যে, ইৰাণৰ বায়ু প্ৰতিৰক্ষা ব্যৱস্থাই বুশ্বেহৰ প্ৰদেশৰ জাম অঞ্চলত আমেৰিকাৰ এখন সামৰিক বিমান গুলীয়াই পেলাইছিল। অৱশ্যে এই দাবীসমূহ আমেৰিকাই স্পষ্টভাৱে অস্বীকাৰ কৰিছে।
ইৰাণৰ সংবাদ সংস্থাৰ মতে, শুকুৰবাৰে পুৱা বুশ্বেহৰ প্ৰদেশৰ ওপৰৰ আকাশত হঠাতে ক্ষেপণাস্ত্ৰৰ জিলিকনি আৰু বিস্ফোৰণৰ শব্দৰ সৃষ্টি হয়।ইৰাণে দাবী কৰিছে যে এয়া আমেৰিকাৰ বিমান আছিল।
অৱশ্যে আমেৰিকাৰ বিষয়াসকলে ইৰাণৰ এই দাবীক সম্পূৰ্ণ মিছা বুলি উলাই কৰিছে। আমেৰিকাৰ এগৰাকী বিষয়াই স্পষ্ট কৰি দিয়ে যে এই অঞ্চলত কোনো আমেৰিকাৰ বিমানৰ ক্ষতি হোৱা নাই।
ইয়াৰ পূৰ্বে ইৰাণৰ এক সংবাদ সংস্থাই প্ৰকাশ কৰা অনুসৰি, ইৰাণৰ সশস্ত্ৰ বাহিনীয়ে দেশখনৰ দক্ষিণ অংশৰ পৰা কেইবাটাও ক্ষেপণাস্ত্ৰ নিক্ষেপ কৰিছিল, যাৰ সঠিক লক্ষ্য এতিয়াও জানিব পৰা হোৱা নাই। ইফালে, তাছনিমৰ মতে, হৰমুজ জলদ্বীপত জাহাজসমূহক সতৰ্ক কৰি দিবলৈ সাগৰত প্ৰচণ্ড গুলীচালনা কৰা হয়, যাৰ ফলত উপকূলীয় অঞ্চলত আতংকৰ সৃষ্টি হয়। ইৰাণৰ ৰিভল্যুচনেৰী গাৰ্ডে (আই আৰ জি চি) হৰমুজৰ ওচৰৰ চাৰিখন বাণিজ্যিক জাহাজক লক্ষ্য কৰি লোৱাৰ মাত্ৰ কেইঘণ্টামানৰ পিছতে এই সামৰিক পদক্ষেপ গ্ৰহণ কৰিছে, যাৰ কিছুমানৰ আমেৰিকাৰ সৈতে সম্পৰ্ক আছে বুলি কোৱা হৈছে।
আচৰিত কথাটো এই যে, এই শেহতীয়া পৰিঘটনা এনে এটা সময়ত ঘটিছে যেতিয়া দুয়োখন দেশে ৬০ দিনৰ অস্থায়ী যুদ্ধবিৰতি আৰু হৰমুজ জলদ্বীপ মুকলি কৰাৰ বাবে “শান্তি চুক্তি”ৰ ওপৰত সন্মতি প্ৰকাশ কৰা বুলি বাতৰি প্ৰচাৰ হৈছিল। কূটনৈতিক টেবুলত শান্তি আলোচনা ৰচনা কৰা হৈছে যদিও দুয়োখন দেশৰ পৰিস্থিতি আকৌ এবাৰ তীব্ৰতৰ হোৱা যেন দেখা গৈছে।
যোৱা ২৮ মে’ত আমেৰিকাই ইৰাণৰ তেল বাণিজ্যৰ ওপৰত নতুন নিষেধাজ্ঞা ঘোষণা কৰে। আমেৰিকাৰ কোষাগাৰ বিভাগে ইৰাণৰ খাৰুৱা তেল আৰু পেট্ৰলিয়াম সামগ্ৰী পৰিবহণৰ সৈতে জড়িত ৮খন জাহাজৰ ব্লেকলিষ্ট কৰে। ইয়াৰ ভিতৰত মাৰ্শ্বেল দ্বীপপুঞ্জ, ক’মৰ’ছ, পানামাত পঞ্জীয়নভুক্ত টেংকাৰসমূহো আছে। আমেৰিকাৰ কোষাগাৰ সচিব স্কট বেছাণ্টে কয় যে, এই নিষেধাজ্ঞাৰ উদ্দেশ্য হৈছে ইৰাণে তেলৰ ৰাজহ ব্যৱহাৰ কৰি সামৰিক শক্তি বৃদ্ধি কৰাত বাধা দিয়া।
