চাকৰিৰ বিনিময়ত ভূমিৰ সৈতে জড়িত ধন সৰবৰাহৰ গোচৰত ৰাষ্ট্ৰীয় জনতা দলৰ অধ্যক্ষ তথা বিহাৰৰ প্ৰাক্তন মুখ্যমন্ত্ৰী লালু প্ৰসাদ যাদৱ আৰু তেওঁৰ পৰিয়ালৰ বিপদ বৃদ্ধি পাইছে। দিল্লীৰ ৰাউজ এভিনিউ আদালতে এই গোচৰত লালু প্ৰসাদ যাদৱ, তেজস্বী যাদৱকে ধৰি বহু অভিযুক্তলৈ চমন জাৰি কৰিছে।
আদালতে তেওঁলোকক অহা ৭ অক্টোবৰত হাজিৰ হ’বলৈ নিৰ্দেশ দিছে।
উল্লেখ্য যে, প্ৰথমবাৰৰ বাবে তেজ প্ৰতাপ যাদৱলৈ ‘চাকৰিৰ বিনিময়ত ভূমি’ৰ গোচৰত চমন প্ৰেৰণ কৰা হৈছে। ৰাউজ এভিনিউ আদালতে পৰৱৰ্তী ৭ অক্টোবৰত লালু প্ৰসাদ যাদৱ, তেজস্বী যাদৱ, তেজ প্ৰতাপ যাদৱ, অখিলেশ্বৰ সিং, হাজাৰী প্ৰসাদ ৰায়, সঞ্জয় ৰায়, ধৰ্মেন্দ্ৰ সিং, কিৰণ দেৱীক চমন কৰিছে।
ইফালে মঙলবাৰে দিল্লী উচ্চ ন্যায়ালয়ে ৰে’লৱেত সংঘটিত ভূমি-চাকৰিৰ কেলেংকাৰিৰ সৈতে জড়িত ধন সৰবৰাহৰ গোচৰত আৰজেডিৰ মুৰব্বী লালু প্ৰসাদৰ ঘনিষ্ঠ সহযোগী অমিত কাত্যলক জামিন মঞ্জুৰ কৰে।
ইডিয়ে এই গোচৰত নিৰ্বাচিতভাৱে কাম কৰাৰ পদক্ষেপকো গৰিহণা দিছে আদালতে। ২২ মে’ত নিম্ন আদালতে কাত্যলক সকাহ দিবলৈ পৰ্যাপ্ত ভিত্তি নাই বুলি উল্লেখ কৰি জামিন আবেদন নাকচ কৰিছিল।
