আজি প্ৰধানমন্ত্ৰী নৰেন্দ্ৰ মোদীৰ নেতৃত্বত কেন্দ্ৰীয় চৰকাৰৰ কেবিনেটে কেইবাটাও গুৰুত্বপূৰ্ণ সিদ্ধান্ত গ্ৰহণ কৰে। মহাকাশ খণ্ডৰ প্ৰসাৰৰ বাবে চৰকাৰে বৃহৎ পৰিমাণৰ ধন প্ৰদান কৰিছে।
ইফালে বিহাৰ আৰু অন্ধ্ৰ প্ৰদেশক পুনৰবাৰ ডাঙৰ উপহাৰ প্ৰদান কৰিছে কেবিনেটে। কেন্দ্ৰীয় চৰকাৰে উত্তৰ প্ৰদেশৰ অযোধ্যাৰ পৰা বিহাৰৰ সীতামড়ীলৈ ৰেলপথ নিৰ্মাণৰ অনুমোদন জনাইছে। নৰকটিয়াগঞ্জ ৰেলপথ ডাবল কৰাৰ কামো কৰা হ’ব বুলি কেবিনেটে সিদ্ধান্ত গ্ৰহণ কৰে।
ইফালে অন্ধ্ৰ প্ৰদেশতো ২৫৭ কিলোমিটাৰ দৈৰ্ঘ্যৰ ৰে’লপথ নিৰ্মাণ কৰা হ’ব এই সকলোবোৰ প্ৰকল্প চাৰি বছৰৰ ভিতৰত সম্পূৰ্ণ হ’ব।
কেন্দ্ৰীয় ৰেল মন্ত্ৰী অশ্বিনী বৈষ্ণৱে কয় যে কেন্দ্ৰীয় চৰকাৰে বিহাৰৰ পূব চম্পাৰণ আৰু পশ্চিম চম্পাৰণ জিলাক এক বৃহৎ উপহাৰ দিছে। অযোধ্যাৰ পৰা মাতা সীতাৰ জন্মস্থান সীতামড়ীলৈ প্ৰায় ২৫৬ কিলোমিটাৰ দৈৰ্ঘ্যৰ ৰেলপথ নিৰ্মাণৰ বাবে কেন্দ্ৰীয় চৰকাৰে অনুমোদন জনাইছে।
নেপাল সীমান্তৰ আশে-পাশে নিৰ্মাণ হ’বলগীয়া এই ৰেলপথে উত্তৰ বিহাৰ, মুজাফ্ফৰপুৰ, মিথিলাঞ্চল, পূব চম্পাৰণ, পশ্চিম চম্পাৰণৰ দৰে চহৰসমূহক সংযুক্ত কৰিব। এই প্ৰকল্পটো ৪৫৫৩ কোটি টকা ব্যয়েৰে সম্পূৰ্ণ হ’ব। ইয়াৰ উপৰি মিথিলাঞ্চলৰ উত্তৰ বিহাৰ আৰু উত্তৰ-পূব ৰাজ্যৰ বাবে এটা বৃহৎ প্ৰকল্পৰ অনুমোদন জনোৱা হৈছে।
ইফালে কেন্দ্ৰীয় চৰকাৰে অন্ধ্ৰ প্ৰদেশৰ অমৰাৱতীকো ডাঙৰ উপহাৰ দিছে। অমৰাৱতীৰ পৰা ৫৭ কিলোমিটাৰ দৈৰ্ঘ্যৰ ৰে’লপথ নিৰ্মাণ কৰা হ’ব, যিয়ে ইয়াক ৫খন বৃহৎ চহৰৰ সৈতে সংযোগ কৰিব। ইয়াৰ ভিতৰত আছে বিজয়াৱাড়া, চেন্নাই, হায়দৰাবাদ।
আনহাতে অন্ধ্ৰ প্ৰদেশৰ কৃষ্ণা নদীত নিৰ্মাণ হ’ব তিনি কিলোমিটাৰ দৈৰ্ঘ্যৰ এখন দলং। এই আঁচনিৰ অধীনত এই লাইনত এটা বিশাল মাল্টি-ম’ডাল লজিষ্টিক হাব নিৰ্মাণ কৰা হ’ব।
ইয়াৰ উপৰি চৰকাৰে দীপাৱলী আৰু ছট পূজাৰ বাবে ৭ হাজাৰ ৰে’ল চলাবলৈ সিদ্ধান্ত লৈছে। ইয়াৰ ফলত দৈনিক দুই লাখ লোকে যাত্ৰা কৰিব পাৰিব।
মোদী চৰকাৰে ষ্টাৰ্টআপ ফৰ স্পেচৰ বাবে ১০০০ কোটি টকাৰ ভেঞ্চাৰ ফাণ্ডত অনুমোদন জনাইছে। এই পুঁজিৰ আবণ্টন কেবিনেট বৈঠকত অনুমোদন জনোৱা হৈছে। এই পুঁজিৰ জৰিয়তে মহাকাশ খণ্ডৰ ষ্টাৰ্টআপসমূহক সহায় আগবঢ়োৱা হ’ব।
