ভাৰতত অব্যাহত কাল ঘূৰ্ণি দানাৰ তাণ্ডৱ লীলা।পশ্চিম বংগ, ওড়িশাত অব্যাহত আছে দানাৰ তাণ্ডৱ। এই ঘূৰ্ণীবতাহৰ বাবেই পশ্চিম বংগ, ওড়িশাত বাতিল কৰা হৈছে বিমান সেৱা।
পুৰণি দীঘা সমুদ্ৰ উপকূলত দানাই লৈছে ভয়াৱহ ৰূপ। দানাৰ এই তাণ্ডৱৰ বাবেই ক্ষতিসাধন হৈছে বিস্তৰ অঞ্চল। পথত উভালি পৰিছে গছ-গছনি, বৈদ্যুতিক খুঁটা।
ভাৰতৰ বতৰ বিজ্ঞান বিভাগে ২৪ অক্টোবৰ অৰ্থাৎ বৃহস্পতিবাৰে মাজনিশাৰ পৰা ঘণ্টাত ১২০ কিলোমিটাৰ গতিবেগেৰে অহা দানাক তীব্ৰ ঘূৰ্ণীবতাহ হিচাপে শ্ৰেণীভুক্ত কৰিছে। এই সাগৰীয় ধুমুহাৰ ফলতেই পশ্চিম বংগ, ওড়িশাত প্ৰচণ্ড বতাহ আৰু বৰষুণৰ ফলত ক্ষতিগ্ৰস্ত হয়। আইএমডিৰ মতে, ২৫ অক্টোবৰ শুকুৰবাৰে পুৱালৈকে ইয়াৰ তাণ্ডৱ চলিয়েই থাকিব।
ওড়িশাৰ উপকূলীয় জিলা ভদ্ৰক, কেন্দ্ৰপাৰা, বালাসৌৰ আৰু নিকটৱৰ্তী জগতসিংপুৰ জিলাত হঠাতে বতাহৰ গতি বৃদ্ধি হোৱা দেখা গৈছে। ৰাজহ বিভাগৰ এগৰাকী বিষয়াই জনোৱা মতে, বিশেষ সাহায্য আয়ুক্তৰ কাৰ্যালয়তো গছ উভালি পৰাৰ খবৰ পোৱা গৈছে।প্ৰচণ্ড বতাহ আৰু মুষলধাৰ বৰষুণৰ ফলত গছ উভালি পেলোৱাৰ ফলত ওড়িশাৰ ভদ্ৰক জিলাত কেইবাটাও পথ অৱৰোধ হৈ পৰে।
আইএমডিয়ে দিয়া তথ্য অনুসৰি, আগন্তুক কেইবা ঘণ্টালৈ অব্যাহত থাকিব দানাৰ প্ৰভাৱ।সাগৰীয় উপকূলৰ পৰা ইতিমধ্যে প্ৰশাসনে স্থানান্তৰ কৰিছে ১০ লাখ লোকক। পশ্চিম বংগ আৰু ওড়িশাত ৩৪৮খন ৰে’লৰ চলাচলো বাতিল কৰা হৈছে।
অসমতো এই কাল ঘূৰ্ণি দানাৰ প্ৰভাৱ দেখিবলৈ পোৱা গৈছে।কেইবাখনো জিলাত বতৰ বিজ্ঞান কেন্দ্ৰই জাৰি কৰিছে ইয়েল্লো এলাৰ্ট।কামৰূপ মহানগৰতো নিশাৰ ভাগৰ পৰাই কিনকিনীয়া বৰষুণ আৰম্ভ হৈছে।
