ছত্তীশগড়ৰ বিজাপুৰ জিলাত আৰক্ষী আৰু মাওবাদীৰ মাজত হোৱা সংঘৰ্ষত দুজন মাওবাদী নিহত হৈছে। বাষ্টাৰৰ আই জি সুন্দৰৰাজ পিয়ে নিশ্চিত কৰিছে যে উছুৰ-বাছাগুড়া-পামেড় ছেক্টৰত এই এনকাউণ্টাৰ সংঘটিত হয়।
নিৰ্ভৰযোগ্য সূত্ৰৰ পৰা লাভ কৰা তথ্যৰ ভিত্তিত নিৰাপত্তাৰক্ষীয়ে অঞ্চলটোত তালাচী অভিযান আৰম্ভ কৰিছিল। অভিযান চলি থকা সময়তে দিনৰ প্ৰায় ১১ মান বজাত হঠাতে মাওবাদীয়ে আৰক্ষীৰ ওপৰত গুলীচালনা কৰে, আৰু তাৰ পিছৰ পৰাই দুয়োপক্ষৰ মাজত সংঘৰ্ষ আৰম্ভ হয়। দুয়োপক্ষৰ মাজত এতিয়াও মাজে মাজে গুলীচালনা চলি আছে যদিও সকলো নিৰাপত্তাৰক্ষী নিৰাপদ বুলি জানিব পৰা গৈছে।
এই এনকাউণ্টাৰ বিজাপুৰ জিলাৰ পামেড় থানা এলেকাৰ ৰাখাপল্লীৰ বনাঞ্চলত সংঘটিত হয়, য’ত কোব্ৰা ২১০ বেটেলিয়ন আৰু ডি আৰ জিৰ যুটীয়া দলে মাওবাদীৰ সৈতে তীব্ৰ সংঘৰ্ষত লিপ্ত হয়।
সূত্ৰৰ পৰা পোৱা তথ্য অনুসৰি এই পৰ্যন্ত দুজন মাওবাদীৰ মৃত্যু হোৱাৰ খবৰ পোৱা গৈছে। অঞ্চলটোত মাওবাদীৰ এটা ডাঙৰ আৰু শক্তিশালী বেটেলিয়নৰ কেম্প থকাৰ সন্দেহ প্ৰকাশ কৰা হৈছে।
