ছ’চিয়েল মিডিয়াত এগৰাকী মহিলাই নদীত পূজা কৰাৰ ভিডিঅ’ ক্ৰমান্বয়ে ভাইৰেল হৈ পৰিছে, য’ত সকলোৱে তেওঁৰ নিৰ্ভীকতা আৰু ধৈৰ্য্যৰ বাবে প্ৰশংসা কৰিছে।
এই ভিডিঅ’টোত এগৰাকী মহিলাই নদীৰ মাজত পূজা কৰি থকা অৱস্থাত দেখিছে যে, এডাল সাপ তেওঁৰ ফালে আহি আছে, কিন্তু অলপো আতংকিত নোহোৱাকৈ মহিলাগৰাকীয়ে সাপটোক তেওঁৰ কাষেৰে পাৰ হ’বলৈ বাট এৰি দিয়ে আৰু শান্ত হৈ থাকে। মহিলাগৰাকীৰ এই সাহসে উপস্থিত সকলো লোকৰে দৃষ্টি আকৰ্ষণ কৰিছে। ইতিমধ্যে এই ভিডিঅ’টো ছ’চিয়েল মিডিয়াত চৰ্চাৰ বিষয় হৈ পৰিছে।
এই ঘটনা সংঘটিত হৈছে ছট পূজাৰ সময়ত, যেতিয়া এগৰাকী মহিলাই নদীত থিয় হৈ পূজাত মগ্ন হৈ আছিল। হঠাতেই এডাল সাপ তেওঁৰ ফালে আহি থকা দেখা যায়।
প্ৰায়ে এনে পৰিস্থিতিত মানুহে আতংকিত হৈ পলাই যাবলৈ চেষ্টা কৰে, যদিও এই মহিলাগৰাকীয়ে ভয় নকৰাকৈ থিয় হৈ থাকে। তেওঁ শান্ত হৈ থাকি সাপটোক তেওঁৰ কাষেৰে পাৰ হৈ যাবলৈ দিয়ে, যি তেওঁৰ অনন্য সাহস আৰু সংযমৰ প্ৰতীকৰূপে দেখা যায়।
ভিডিঅ’টো চোৱাৰ পাছত মহিলাগৰাকীৰ সাহস আৰু সংযমৰ প্ৰশংসা কৰে উপস্থিত ৰাইজে। এই ভিডিঅ’টোত ছট পূজাৰ বিশেষ সাৰমৰ্ম দেখিবলৈ পোৱা গৈছে। যেতিয়া ভক্তসকলে কঠিন পৰিস্থিতিতো নিজৰ বিশ্বাসৰ প্ৰতি সমৰ্পিত হৈ থাকে, তেতিয়া ভগবানো সহায়ক হয়। সকলোৱে তেওঁৰ বিশ্বাস আৰু ধৈৰ্য্যৰ নিদৰ্শন বুলি অভিহিত কৰি ছ’চিয়েল মিডিয়াত মহিলাগৰাকীৰ সাহসক প্ৰণাম জনায়।
উল্লেখ্য যে, বিহাৰ, ঝাৰখণ্ড আৰু উত্তৰ প্ৰদেশৰ লগতে দেশৰ অন্যান্য প্ৰান্ততো উদযাপন কৰা হয় ছট পূজা। এই উৎসৱত পানীত থিয় হৈ সূৰ্য্য দেৱতাক অৰ্ঘ্য প্ৰদান কৰা হয়। সাহসেৰে এইগৰাকী মহিলাই এই উৎসৱৰ স্বাভিমান আৰু বিশ্বাস আৰু অধিক বৃদ্ধি কৰিছে।
