ভাৰতৰ চুবুৰীয়া ৰাষ্ট্ৰ বাংলাদেশত শ্বেখ হাছিনা চৰকাৰ পতন হোৱাৰ পিছৰে পৰা আক্ৰমণ আৰু অত্যাচাৰৰ বলি হৈছে সংখ্যালঘু হিন্দুসকল। আধ্যাত্মিক নেতা চিন্ময় কৃষ্ণ দাসক গ্ৰেপ্তাৰক লৈ চলি থকা প্ৰতিবাদৰ মাজতে বাংলাদেশৰ চট্টগ্ৰামৰ পৰা আৰু এজন হিন্দু পূজাৰীক গ্ৰেপ্তাৰ কৰাৰ খবৰ আহিছে।
গ্ৰেপ্তাৰ হোৱা পূজাৰীজনক শ্যাম দাস প্ৰভু বুলি চিনাক্ত কৰা হৈছে। জেইলত বন্দী হৈ থকা চিন্ময় কৃষ্ণ দাসক সাক্ষাত কৰিবলৈ গৈছিল শ্যাম দাসে। আৰু সেই অভিযোগতেই কোনো এৰেষ্ট ৱাৰেণ্ট নিদিয়াকৈ তেওঁক গ্ৰেপ্তাৰ কৰাৰ অভিযোগ উত্থাপন হৈছে।
এই ঘটনা সন্দৰ্ভত ইস্কন কলিকতাৰ উপাধ্যক্ষ তথা মুখপাত্ৰ ৰাধাৰমণ দাসে তেওঁৰ গ্ৰেপ্তাৰ সন্দৰ্ভত ছ’চিয়েল মিডিয়া প্লেটফৰ্ম এক্সযোগে প্ৰতিক্ৰিয়া প্ৰকাশ কৰি কয় যে আৰু এজন ব্ৰহ্মচাৰী শ্যাম দাস প্ৰভুক চট্টগ্ৰাম আৰক্ষীয়ে গ্ৰেপ্তাৰ কৰিছে।
উল্লেখ্য যে, ইণ্টাৰনেশ্যনেল ছ’চাইটি ফৰ কৃষ্ণ কনচিয়াছনেছ চমুকৈ ইস্কনৰ প্ৰাক্তন সদস্য হিন্দু পূজাৰী চিন্ময় কৃষ্ণ দাসক সোমবাৰে ৰাষ্ট্ৰদ্ৰোহৰ গোচৰত গ্ৰেপ্তাৰ কৰিছিল। মঙলবাৰে তেওঁৰ জামিন দিবলৈ অস্বীকাৰ কৰাৰ পিছৰে ৰাজধানী ঢাকাসহ বাংলাদেশৰ বিভিন্ন অঞ্চলত হিন্দু লোকসকলে তীব্ৰ বিৰোধ প্ৰদৰ্শন অব্যাহত ৰাখিছে।
