অসমৰ টেনিছ বল ক্ৰিকেটৰ চিৰ পৰিচিত নাম ডেভিড গগৈয়ে পুনৰ এবাৰ উজলিল ৰাষ্ট্ৰীয় পৰ্যায়ত। টেনিছ বল ক্ৰিকেটক অধিক জনপ্ৰিয় কৰাৰ উদ্দেশ্যে বিগত বৰ্ষৰ পৰা আৰম্ভ হোৱা ইণ্ডিয়ান ষ্ট্ৰিট প্ৰিমিয়াৰ লীগ চমুকৈ ISPLত ডেভিড গগৈয়ে দ্বিতীয় ছিজনৰ বাবে চুক্তিবদ্ধ হ’ল চেন্নাই সিংঘমছ দলত।
বুধবাৰে মুম্বাইত অনুষ্ঠিত হোৱা নিলামত চেন্নাই সিংঘমছ দলে অসমৰ ডেভিড গগৈক ৪.২০ লাখ টকাত চুক্তিবদ্ধ কৰে। প্ৰতিযোগিতাখনৰ বাবে তেওঁৰ বেছ প্ৰাইজ আছিল ৩ লাখ টকা।
২০২৫ বৰ্ষৰ ছিজনৰ বাবে ৫৫ খন চহৰৰ মুঠ ৩৫০ গৰাকী ক্ৰিকেটাৰ নিলামৰ বাবে নিৰ্বাচিত হৈছিল। এইবাৰৰ নিলামত সৰ্বাধিক মূল্যত বিক্ৰী হোৱা ক্ৰিকেটাৰগৰাকী হৈছে অভিষেক কুমাৰ দালহোৰ। অনুভৱী অলৰাউণ্ডাৰগৰাকীক মাঝি মুম্বাই দলে ২০,৫০,০০০ টকাত ক্ৰয় কৰে।
নিলামত দ্বিতীয় সৰ্বাধিক মূল্যত বিক্ৰী হয় কেটন মাত্ৰে। তেওঁক চেন্নাই চিংঘমছে ১৭.২৫ লাখ টকাত ক্ৰয় কৰে। ফালকন ৰাইজাৰ্ছ হায়দৰাবাদ দলে ইৰফান উমেইৰক ১৬.৫০ লাখ টকাত ক্ৰয় কৰে। আগন্তুক ছিজনৰ বাবে তৃতীয় সৰ্বাধিক মূল্যত বিক্ৰী হোৱা ক্ৰিকেটাৰ হৈছে ইৰফান।
ইণ্ডিয়ান ষ্ট্ৰিট প্ৰিমিয়াৰ লীগ (ISPL) হৈছে ভাৰতত অনুষ্ঠিত হোৱা T10 টেনিছ বল ক্ৰিকেট লীগ। দেশৰ চুকে কোণে সিচৰিত হৈ থকা উদীয়মান ক্ৰিকেট প্ৰতিভাক এখন উপযুক্ত প্লেটফৰ্ম উপহাৰ দিয়াৰ লক্ষ্যৰে প্ৰথমবাৰৰ বাবে ২০২৪ চনত আৰম্ভ হৈছিল এই লীগ।
এই প্ৰতিযোগিতাখনৰ আৰম্ভণি ছিজনত ডিব্ৰুগড়ৰ সন্তান ডেভিড গগৈয়ে বলিউদৰ অভিনেতা অমিতাভ বচ্চন মালিকানাধীন মাঝি মুম্বাইৰ হৈ অংশগ্ৰহণ কৰিছিল। প্ৰথম ছিজনত ডেভিড গগৈৰ দল মাঝি মুম্বাইয়ে ৰানাৰ্ছ আপৰ খিতাপ দখল কৰিছিল। চেম্পিয়ন হৈছিল টাইগাৰ্ছ অৱ কলিকতা।
ISPLৰ প্ৰথম ছিজনত ৩ লাখ টকাত বিক্ৰী হোৱা ডেভিড গগৈয়ে এইবাৰ ৪.২০ লাখ টকাত চেন্নাই সিংঘমছ দলত চুক্তি হোৱাক লৈ অসমৰ ক্ৰিকেট অনুৰাগীৰ মাজত আনন্দৰ লহৰ উঠা পৰিলক্ষিত হৈছে।
উল্লেখ্য যে, যোৱাবাৰ এই প্ৰতিযোগিতাখনৰ মূল সমিটিৰ সদস্য হিচাপে আছিল ভাৰতীয় ক্ৰিকেট দলৰ প্ৰাক্তন ক্ৰিকেটাৰ শচীন তেণ্ডুলকাৰ, বিচিচিআইৰ কোষাধ্যক্ষ আশীষ শ্বেলাৰ আৰু আমোল কালে। আনহাতে ভাৰতৰ ৰাষ্ট্ৰীয় ক্ৰিকেট দলৰ প্ৰাক্তন মুখ্য প্ৰশিক্ষক ৰবি শাস্ত্ৰীক প্ৰতিযোগিতাখনৰ চিফ মেণ্টৰ হিচাপে নিযুক্তি দিয়া হৈছিল।
ছয়টা দলৰ মাজত অনুষ্ঠিত হ’ব এই প্ৰতিযোগিতাখন। দল কেইটা হৈছে-
বেংগালোৰ ষ্ট্ৰাইকাৰ্ছ- মালিক- ঋত্বিক ৰোশন
চেন্নাই সিংঘমছ- মালিক- দাক্ষিণাত্যৰ জনপ্ৰিয় অভিনেতা সুৰিয়া
ফালকন ৰাইজাৰ্ছ হায়দৰাবাদ- মালিক- ৰাম চৰণ
টাইগাৰ্ছ অৱ কলিকতা- মালিক- চেইফ আলী খান আৰু কৰিণা কাপুৰ খান
মাঝি মুম্বাই- মালিক- অমিতাভ বচ্চন
শ্ৰীনগৰ কে বীৰ- মালিক- অক্ষয় কুমাৰ
