মধ্যপ্ৰদেশৰ দেৱাছত বন্ধ কোঠাত ৰখা এটা ফ্ৰীজত এগৰাকী যুৱতীৰ দেহ উদ্ধাৰ হোৱাত এক চাঞ্চল্য বিয়পি পৰে। ১০ মাহ পূৰ্বে যুৱতীগৰাকীৰ প্ৰেমিকে এই ভয়ংকৰ কাণ্ড সংঘটিত কৰি দেহটো ফ্ৰীজত ৰাখি থৈছিল।
যুৱতীগৰাকীৰ নাম পিংকী ওৰফে প্ৰতিভা প্ৰজাপতি।তেওঁ নিজৰ প্ৰেমিক সঞ্জয় পাটিদাৰৰ সৈতে ইন্দোৰৰ ভাৰাঘৰত লিভ ইনত আছিল। যুৱতীগৰাকীৰ প্ৰেমিকেয়ে নিজৰ বন্ধুৰ সৈতে লগ লাগি এই ভয়ংকৰ ঘটনা সংঘটিত কৰা বুলি অভিযোগ উত্থাপিত হৈছে।ইতিমধ্যে আৰক্ষীয়ে অভিযুক্তক গ্ৰেপ্তাৰ কৰিছে।
এই ঘটনাটো দেৱাছ চহৰৰ বাইপাছ পথত অৱস্থিত বৃন্দাবন ধাম কলনীৰ। শুকুৰবাৰে পুৱা বলবীৰ সিঙ নামৰ এজন লোকে বন্ধ কোঠাৰ পৰা অহা দুৰ্গন্ধৰ বিষয়ে আৰক্ষীক অভিযোগ দিছিল। ইয়াৰ পিছতেই বেংক নোট প্ৰেছ আৰক্ষী থানাৰ আৰক্ষী সেই স্থানত উপস্থিত হৈ কোঠাটো খুলি দি ফ্ৰীজৰ পৰা যুৱতীগৰাকীৰ দেহ উদ্ধাৰ কৰে।
ঘটনাস্থলীত উপস্থিত হৈ এফ এছ এলৰ দলে পুংখানুপুংখ তদন্তৰ অন্তত প্ৰমাণ সংগ্ৰহ কৰে। বুধবাৰে নিশাৰ পৰা ফ্ৰীজৰ পৰা দুৰ্গন্ধ ওলাই থকা বুলি আৰক্ষীক জনাই বলবীৰে।
আৰক্ষীয়ে জানিবলৈ দিয়ে যে, ২০২৩ চনৰ জুলাই মাহত ঘৰৰ মালিক ধীৰেন্দ্ৰ শ্ৰীবাস্তৱে সঞ্জয় পাটিদাৰক এই ঘৰটো ভাড়ালৈ দিছিল। ২০২৪ চনৰ জুন মাহতেই সঞ্জয়ে ঘৰটো খালী কৰিছিল যদিও ফ্ৰীজকে ধৰি কোঠাত কিছু সামগ্ৰী এৰি থৈ গৈছিল। এই ফ্ৰীজতে উদ্ধাৰ হয় যুৱতীগৰাকীৰ দেহ। এই সময়ছোৱাত সঞ্জয় এই ঘৰটোলৈ আহিছিল যদিও ঘৰটো সম্পূৰ্ণ খালী কৰা নাছিল।
বলবীৰৰ তথ্যত আৰক্ষীয়ে সেই স্থানত উপস্থিত হৈ তদন্ত আৰম্ভ কৰে। তদন্তৰ সময়ত আৰক্ষীয়ে জানিবলৈ পাই যে, ২০২৪ চনৰ মাৰ্চ মাহৰ পৰা প্ৰতিভাক কোনেও দেখিবলৈ পোৱা নাছিল। ইফালে সঞ্জয়ে ওচৰ-চুবুৰীয়াক প্ৰতিভা নিজৰ ঘৰলৈ যোৱা বুলি কৈছিল।
উল্লেখ্য যে, উজ্জয়িনীৰ পৰা গ্ৰেপ্তাৰ হোৱা সঞ্জয় পাটিদাৰে প্ৰতিভাৰ সৈতে পাঁচ বছৰ ধৰি লিভ ইন সম্পৰ্কত থকা বুলি জানিবলৈ দিয়ে। তিনিবছৰ উজ্জয়িনীত প্ৰতিভাক ৰখাৰ পিছত দুবছৰ পূৰ্বে প্ৰতিভাক দেৱাছলৈ লৈ আহিছিল। সঞ্জয়ে জনোৱা মতে, ২০২৪ চনৰ জানুৱাৰী মাহৰ পৰা প্ৰতিভাই তেওঁক বিয়াৰ বাবে হেঁচা প্ৰয়োগ কৰি আছিল। ইয়াকে লৈ বিৰক্ত হৈ পৰিছিল সঞ্জয়। কিয়নো তেওঁ ইতিমধ্যে বিবাহিত।
অভিযুক্তই জনোৱা মতে, তেওঁ বন্ধু বিনোদ ডেভৰ সৈতে এই হত্যাকাণ্ডৰ পৰিকল্পনা কৰিছিল। মাৰ্চ মাহত প্ৰতিভাক ভাড়াঘৰত ডিঙি চেপি হত্যা কৰি দেহটো ফ্ৰীজত কাপোৰেৰে ঢাকি থৈ দিয়া বুলি কয় সঞ্জয়ে। বৰ্তমানেও আৰক্ষীয়ে তদন্ত অব্যাহত ৰাখিছে। ইফালে যুৱতীগৰাকীৰ মৰণোত্তৰ পৰীক্ষা সম্পন্ন কৰিছে চিকিৎসকৰ দলে।
