দেওবাৰে ছত্তীশগড়ৰ বিজাপুৰ জিলাত সেনা বাহিনীৰে হোৱা সংঘৰ্ষত ৩১ গৰাকী মাওবাদী নিহত হোৱাৰ লগতে দুজন জোৱান শ্বহীদ হোৱাৰ খবৰ আহিছে। এই তথ্য প্ৰকাশ কৰিছে আৰক্ষীয়ে।
আজি ৰাতিপুৱা ইন্দ্ৰৱতী ৰাষ্ট্ৰীয় উদ্যানৰ ঘন জংঘলত এই ঘটনা সংঘটিত হৈছে। এজন শীৰ্ষ আৰক্ষী বিষয়াই জনোৱা অনুসৰি, নিৰ্ভৰ যোগ্য সূত্ৰৰ পৰা লাভ কৰা তথ্যৰ ভিত্তিত আজি নিৰাপত্তাৰক্ষীৰ এটা দলে উদ্যানখনত অভিযান চলাবলৈ গৈছিল।
অভিযান চলাই থকাৰ সময়তে উদ্যানখনৰ জংঘলত আত্মগোপন কৰি থকা মাওবাদীৰ দলটোৱে নিৰাপত্তাৰক্ষী বাহিনীৰ দলটোক আক্ৰমণ চলায়। লগে লগে এই আক্ৰমণৰ তীব্ৰ প্ৰত্যুত্তৰ দিয়ে নিৰাপত্তাৰক্ষীৰ দলটোৱে।
‘দুয়ো পক্ষৰ মাজত চলা এই এনকাউণ্টাৰত ১২ গৰাকী মাওবাদী নিহত হয়’, এই কথা জানিবলৈ দিয়ে এজন শীৰ্ষ আৰক্ষী বিষয়াই।
ৰাষ্ট্ৰীয় সংবাদ মাধ্যমত প্ৰকাশিত খবৰ অনুসৰি এতিয়াও অঞ্চলটোত নিৰাপত্তাৰক্ষী আৰু মাওবাদীৰ মাজত গুলীচালনা অব্যাহত আছে।
