মহাৰাষ্ট্ৰৰ অবিভক্ত শিৱসেনাৰ কি হৈছিল সেয়া আমি সকলোৱে জানো। এতিয়া পশ্চিমবংগ বিধানসভাৰ নিৰ্বাচনৰ ফলাফলৰ ১মাহৰ ভিতৰতে বংগতো আৰম্ভ হৈছে একেটা “মহাৰাষ্ট্ৰ মডেল”ৰ আলোচনা।
আচলতে অলপতে তৃণমূল কংগ্ৰেছৰ এখন বৈঠক আহ্বান কৰা হৈছিল। মমতা বেনাৰ্জীৰ বাসগৃহত অনুষ্ঠিত হোৱা পূৰ্ব পৰিকল্পিত এই বৈঠকত অধিকাংশ বিধায়কেই উপস্থিত নাথাকে। ইয়াৰ ফলত তৃণমূল কংগ্ৰেছতো বিভাজন হ’বলৈ ওলাইছে নেকি, সেই লৈ প্ৰশ্নৰ উত্থাপন হৈছে।
মমতা বেনাৰ্জী আৰু অভিষেক বেনাৰ্জীৰ অবিহনে নতুন তৃণমূল কংগ্ৰেছৰ উত্থান ঘটিব পাৰে বুলি পশ্চিম বংগৰ ৰাজনীতিত ক্ৰমাৎ হুলস্থুলৰ সৃষ্টি হৈছে। এই দলৰ নাম পূৰ্বৰ নামৰ লগত সামঞ্জস্য থকাও হ’ব পাৰে অথবা “প্ৰকৃত” তৃণমূল কংগ্ৰেছও হ’ব পাৰে। ইফালে আকৌ স্বাক্ষৰ বিতৰ্কক লৈ দলৰ বিৰুদ্ধে মাত মতা তৃণমূলৰ ২গৰাকী বিধায়ক- ঋতব্ৰত বন্দোপাধ্যায় আৰু সন্দিপন সাহাক বহিষ্কাৰ কৰা হৈছিল। ইয়াৰ পিছতে দলটোৰ মাজত বিদ্ৰোহ তীব্ৰতৰ হৈ পৰিছিল।
এতিয়া প্ৰশ্ন উত্থাপন হৈছে যে, “মহাৰাষ্ট্ৰ মডেল”ৰ পুনৰাবৃত্তি হ’ব নেকি বংগত? ২০২২ চনত শিৱসেনাৰ ভিতৰত হোৱা বিভাজনৰ দৰে বিভাজনৰ সন্মুখীন হ’বনে তৃণমূল? ২জনকৈ বিধায়কক বহিষ্কাৰ কৰাৰ ফলত ইয়াৰ সম্ভাৱনা আৰু অধিক বৃদ্ধি পাইছে। প্ৰায় ৫০ জন বিধায়কে তৃণমূল এৰি যাব পাৰে বুলি জল্পনা-কল্পনাৰ সৃষ্টি হৈছে। লগতে কোৱা হৈছে যে, ইতিমধ্যে একাংশ সাংসদে এই বিষয়ত আলোচনা আৰম্ভ কৰিছে।
মমতা বেনাৰ্জীৰ বাসগৃহত প্ৰায়বোৰ বিধায়ক অনুপস্থিতিৰ কাৰণ বুজাবলৈ অসংখ্য প্ৰচেষ্টা চলোৱাৰ সময়তে এই ক্ষোভ স্পষ্ট হৈ পৰিছে। একাংশ বিধায়কে দলৰ শীৰ্ষ নেতৃত্বৰ বিৰুদ্ধে মুকলিকৈ মাত মাতিবলৈ আৰম্ভ কৰিছে। ইফালে আকৌ একাংশক দল বিৰোধী কাৰ্যকলাপৰ অভিযোগত বহিষ্কাৰ কৰা হৈছে। ইয়াৰ ফলত পৰিস্থিতি আৰু অধিক ভয়াৱহ হৈ উঠিছে।
এই পৰিস্থিতিৰ বাবে মমতা বেনাৰ্জীয়ে নিজৰ দল আৰু বিৰোধী দলৰ ভিতৰৰ এটা ফৈদক দোষাৰোপ কৰিছে। তৃণমূলৰ বিধায়ক-সাংসদক ভয়-ভীতি আৰু উৎকোচৰ জৰিয়তে বিজেপিয়ে নিজৰ পক্ষলৈ আকৰ্ষণ কৰিবলৈ চেষ্টা চলাইছে বুলি অভিযোগ উত্থাপন কৰে ছানীয়ে। আৰক্ষীৰ অপব্যৱহাৰ কৰা হৈছে আৰু তেওঁৰ দলৰ কিছুমান নেতাই “দেশদ্ৰোহী”ৰ দৰে আচৰণ কৰা বুলিও অভিযোগ উত্থাপন হৈছে। শনিবাৰে কালিঘাটত অনুষ্ঠিত হোৱা বৈঠকত তৃণমূলৰ ৮০জন বিধায়কৰ ভিতৰত কমেও ৬০জন অনুপস্থিত থাকে।
