১০ বছৰীয়া বিবাদ নিষ্পত্তিৰ বাবে আজি প্ৰথমবাৰৰ বাবে তেলেংগানাৰ মুখ্যমন্ত্ৰী ৰেৱন্ত ৰেড্ডী আৰু অন্ধ্ৰপ্ৰদেশৰ মুখ্যমন্ত্ৰী চন্দ্ৰবাবু নাইডুৰ মাজত বৈঠক অনুষ্ঠিত হ’ব। তথ্য অনুসৰি দুয়োগৰাকী নেতাই বিভাজনকে ধৰি আন বহু বিষয়ত আলোচনা কৰাৰ সম্ভাৱনা আছে।
এই বৈঠকখন গুৰুত্বপূর্ণ বুলি বিবেচিত হৈছে কাৰণ দুয়োজন নেতাই মুখ্যমন্ত্রী পদত অধিষ্ঠিত হোৱাৰ পাছত প্রথমবাৰৰ বাবে বৈঠকত মিলিত হ’ব।
নাইডু অন্ধ্ৰপ্ৰদেশৰ মুখ্যমন্ত্ৰী আৰু কে চি আৰ তেলেংগানাৰ মুখ্যমন্ত্ৰী হৈ থকাৰ পিছৰে পৰা এই সমস্যাসমূহ অমীমাংসিত হৈ আছে।
উল্লেখ্য যে ৰাজনৈতিক বিবাদ, বিশেষকৈ ২০১৫ চনৰ ধনৰ বিনিময়ত ভোটৰ কেলেংকাৰীয়ে আন্তঃৰাজ্যিক সম্পৰ্কত প্ৰভাৱ পেলাইছিল। অৱশ্যে ৱাই এছ আৰ চি পিৰ মুৰব্বী ৱাই এছ জগন মোহন ৰেড্ডীয়ে ২০১৯ চনৰ নিৰ্বাচনৰ পিছত বিষয়টো নিষ্পত্তি কৰাৰ উদ্দেশ্যে কে চি আৰৰ সৈতে বৈঠকত মিলিত হৈছিল। কিন্তু এই বৈঠকেও দুয়োখন ৰাজ্যৰ মাজত চলা বিবাদ ওৰ পেলাবলৈ সক্ষম নহ’ল।
শেহতীয়াকৈ অনুষ্ঠিত হৈ যোৱা অন্ধ্ৰ প্ৰদেশ বিধানসভা নিৰ্বাচনত ঐতিহাসিক জয়েৰে পুনৰবাৰ ক্ষমতালৈ আহিল নাইডু। ইয়াৰ পিছতেই নাইডুৱে এখন পত্ৰৰ জৰিয়তে তেলেংগানাৰ সমকক্ষক শান্তিৰ প্ৰস্তাৱ আগবঢ়ায়।
ৰেৱন্ত ৰেড্ডীয়েও একেধৰণৰ প্ৰতিক্ৰিয়া প্ৰকাশ কৰে আৰু তাৰ পিছত ৬ জুলাইত তেলেংগানাৰ ৰাজধানীস্থিত প্ৰজা ভৱনত এখন বৈঠকৰ দিন ধাৰ্য কৰা হয়।
২০১৪ চনৰ অন্ধ্ৰ প্ৰদেশ পুনৰ্গঠন আইনৰ নৱম আৰু দশম অনুসূচীত উল্লেখ থকা ৰাজ্য দুখনৰ মাজত সম্পত্তিৰ বিভাজন, কৃষ্ণা আৰু গোদাবৰী নৈৰ পানী ভাগ বতৰা আদিকে ধৰি আন বিভিন্ন বিষয়ত আলোচনা হ’ব বুলি আশা কৰা হৈছে।
