আজি অৰ্থাৎ ২৫ মাৰ্চত দিল্লী বিধানসভাত ভাৰতীয় জনতা পাৰ্টি নেতৃত্বাধীন চৰকাৰে প্ৰথমখন বাজেট দাখিল কৰিব। ইয়াৰ ভিতৰত যমুনা নদী পৰিষ্কাৰ কৰা, আন্তঃগাঁথনি উন্নয়ন আৰু মৌলিক সা-সুবিধাসমূহ শক্তিশালী কৰাৰ দৰে নিৰ্বাচনী প্ৰতিশ্ৰুতিসমূহ কাৰ্যকৰী কৰাৰ বাবে পুঁজিৰ ব্যৱস্থা কৰা হ’ব।
দিল্লীৰ মুখ্যমন্ত্ৰী ৰেখা গুপ্তাই সোমবাৰে বাজেট অধিবেশন আৰম্ভ হোৱাৰ পূৰ্বে ‘উন্নত দিল্লী’ৰ ‘মধুৰতা’ৰ প্ৰতীক হিচাপে ‘খীৰ’ উৎসৱৰ আয়োজন কৰে। চৰকাৰী সূত্ৰই জনোৱা মতে, বিধানসভাত দাখিল হ’বলগীয়া ২০২৫-২৬ চনৰ বাজেটখনে ৮০ হাজাৰ কোটি টকাৰ পৰিসংখ্যা অতিক্ৰম কৰিব পাৰে।
উল্লেখ্য যে, ২৭ বছৰৰ পাছত দিল্লীত বিজেপি চৰকাৰ গঠন হোৱাৰ পিছত প্ৰধানমন্ত্ৰী নৰেন্দ্ৰ মোদীৰ নেতৃত্বত প্ৰথমবাৰৰ বাবে দিল্লীৰ মুখ্যমন্ত্ৰী ৰেখা গুপ্তাই আজি প্ৰথমখন বাজেট দাখিল কৰিব। তেওঁ বিত্ত মন্ত্ৰালয়ৰ দায়িত্বত আছে। বিধানসভা চৌহদত আয়োজন কৰা ‘খীৰ’ অনুষ্ঠানত অংশগ্ৰহণ কৰি মুখ্যমন্ত্ৰী ৰেখা গুপ্তাই কয় যে, দিল্লী বিধানসভাৰ ইতিহাসত প্ৰথমবাৰৰ বাবে বাজেট দাখিলৰ পূৰ্বে এনে এক অনুষ্ঠানৰ আয়োজন কৰা হৈছে।
ইফালে বাজেট দাখিল কৰাৰ এদিন পূৰ্বে অৰ্থনৈতিক সমীক্ষা দাখিল নকৰাৰ বাবে বিৰোধী নেতা তথা প্ৰাক্তন মুখ্যমন্ত্ৰী আতিশীয়ে ৰেখা গুপ্তা চৰকাৰক সমালোচনা কৰে। বাজেট অধিৱেশনৰ আৰম্ভণিতে বিজেপিয়ে আয়োজন কৰা খীৰ অনুষ্ঠানত নিন্দা কৰি তেওঁ কয় যে, দিল্লীৰ বাজেট খীৰ বনাই প্ৰস্তুত কৰিব নোৱাৰি, অৰ্থনৈতিক তথ্যৰ ভিত্তিতহে প্ৰস্তুত কৰিব পাৰি।
