সালসলনি ঘটোৱা হ’ল সংসদৰ বৰ্ষাকালীন অধিৱেশনৰ সময়সূচী। কেন্দ্ৰীয় সংসদীয় পৰিক্ৰমা মন্ত্ৰী কিৰেন ৰিজিজুৱে ঘোষণা কৰে যে সংসদৰ বৰ্ষাকালীন অধিৱেশন ২১ জুলাইৰ পৰা ২১ আগষ্টলৈ চলিব। ইয়াৰ পূৰ্বে ২১ জুলাইৰ পৰা ১২ আগষ্টলৈ বৰ্ষাকালীন অধিৱেশনৰ তাৰিখ প্ৰস্তাৱ কৰা হৈছিল।
সাধাৰণতে সংসদৰ বৰ্ষাকালীন অধিৱেশন স্বাধীনতা দিৱসৰ পূৰ্বে (১৫ আগষ্ট) অন্ত পৰে, কিন্তু এইবাৰ প্ৰথমবাৰৰ বাবে ১৫ আগষ্টৰ পিছতো অধিৱেশন চলি থাকিব।
ৰিজিজুৱে কয় যে ৰাষ্ট্ৰপতি দ্ৰৌপদী মুৰ্মুৱে সংসদৰ বৰ্ষাকালীন অধিৱেশনৰ নতুন তাৰিখত অনুমোদন জনাইছে। এতিয়া সংসদৰ বৰ্ষাকালীন অধিৱেশন ২১ জুলাইৰ পৰা আৰম্ভ হ’ব আৰু ইয়াৰ অন্ত পৰিব ২১ আগষ্টত। প্ৰথম দিনা পুৱা ১১ বজাৰ পৰা আৰম্ভ হ’ব লোকসভা আৰু ৰাজ্যসভা দুয়োটাৰে কাৰ্য্যবিধি।
এই অধিবেশনক বিশেষ বুলি গণ্য কৰা হৈছে, কিয়নো শেহতীয়াকৈ বিৰোধীয়ে সংসদৰ বিশেষ অধিৱেশনৰ দাবী জনাইছিল। ৩ জুনত বিৰোধীয়ে প্ৰধানমন্ত্ৰী নৰেন্দ্ৰ মোডীলৈ এখন পত্ৰ লিখি পেহেলগামত সংঘটিত সন্ত্ৰাসবাদী আক্ৰমণ আৰু তাৰ পিছত চৰকাৰে আৰম্ভ কৰা সামৰিক অভিযান অপাৰেশ্যন সিন্দূৰ সন্দৰ্ভত শীঘ্ৰে আলোচনা কৰাৰ দাবী জনায়।
