মহাকাশচাৰী শুভাংশু শুক্লা আৰু আন তিনিজন মহাকাশচাৰীয়ে মঙলবাৰে (১৫ জুলাই) আন্তঃৰাষ্ট্ৰীয় মহাকাশ কেন্দ্ৰৰ পৰা পৃথিৱীলৈ উভতি আহে। আন্তঃৰাষ্ট্ৰীয় মহাকাশ কেন্দ্ৰত ১৮ দিন কটোৱা এই দলটোৱে ২২.৫ ঘণ্টীয়া যাত্ৰাৰ অন্তত তেওঁলোকক কঢ়িয়াই অনা ড্ৰেগন মহাকাশযানখন কেলিফৰ্ণিয়াৰ ছান ডিয়েগোত অৱতৰণ কৰে।
মিছন পাইলট শুভাংশু শুক্লাই মুখত এমোকোৰা হাঁহি লৈ ড্ৰেগন মহাকাশযানৰ পৰা ওলাই আহি ১৮ দিনৰ পিছত প্ৰথমবাৰৰ বাবে মাধ্যাকৰ্ষণ শক্তিৰ অভিজ্ঞতা লাভ কৰে।
চাৰিওজন মহাকাশচাৰীৰ ভিতৰত প্ৰথমে মহাকাশযানৰ পৰা কমাণ্ডাৰ পেগী হুইটছন গান ওলাই আহে আৰু তাৰ পিছত মিছন পাইলট শুভাংশু শুক্লা বাহিৰলৈ আহে।
পৃথিৱীলৈ উভতি অহাৰ পিছত শুভাংশু শুক্লাসহ বাকী কেইজন মহাকাশচাৰীক ১০ দিনৰ আইছ’লেশ্যনত ৰখা হ’ব। এই সময়সীমাৰ পিছতহে তেওঁলোকে সাধাৰণ জীৱন যাপন আৰম্ভ কৰিব পাৰিব।
উল্লেখ্য যে, দেওবাৰে (১৩ জুলাই) আন্তঃৰাষ্ট্ৰীয় মহাকাশ কেন্দ্ৰত অনুষ্ঠিত হোৱা বিদায় অনুষ্ঠানত শুভাংশু শুক্লাই কৈছিল, ‘শীঘ্ৰে পৃথিৱীত সকলোকে লগ পাম’।
শুভাংশু শুক্লা হৈছে ৰাকেশ শৰ্মাৰ পিছত মহাকাশ ভ্ৰমণ কৰা দ্বিতীয়জন ভাৰতীয় মহাকাশচাৰী। এক্সিয়াম-৪ অভিযানৰ অংশ আছিল ভাৰত, পোলেণ্ড আৰু হাংগেৰী।
