নলবাৰী জিলা দিৱসৰ দিনাই বিকাশৰ বাৰ্তা লৈ আজি নলবাৰীত উপস্থিত হ’ল মুখ্যমন্ত্ৰী ড০ হিমন্ত বিশ্ব শৰ্মা। কেইবাটাও কাৰ্যসূচী লৈ নলবাৰীৰ বাবে ৫৭৬ কোটিৰ প্ৰকল্পৰ সৈতে উপস্থিত হয় মুখ্যমন্ত্ৰী হিমন্ত বিশ্ব শৰ্মাই।
আজি বহু আকাংক্ষিত নলবাৰীৰ বৰকুৰাৰ ৰে’লপথৰ ওপৰৰ উৰণ সেতুখন আনুষ্ঠানিকভাবে উদ্বোধন কৰি ৰাইজৰ বাবে মুকলি কৰে। ৬৯ কোটি টকা ব্যয় সাপেক্ষে নিৰ্মাণ কৰা এই উৰণ সেতুৰ নামাকৰণ কৰা হৈছে কুমাৰ ভাস্কৰ বৰ্মা উৰণ সেতু নামেৰে।
প্ৰাক্তন বিধায়ক অশোক শৰ্মাৰ দিনত শিলান্যাস কৰা এই উৰণ সেতুৱে নলবাৰী চহৰত প্ৰবেশ কৰা পথৰ যান-জঁটৰ কিছু উপসম ঘটাব বুলি অনুমান কৰা হৈছে। বৰকুৰা উৰণ সেতুৰ লগতে গোপাল বজাৰ, বালিতাৰা, চামতা আৰু মিলন বজাৰ বিদ্যুত উপকেন্দ্ৰৰো শুভ উদ্বোধন কৰে মুখ্যমন্ত্ৰীয়ে।
একেদৰে মুখ্যমন্ত্ৰীৰ উন্নত পকী পথ নিৰ্মাণ আঁচনিৰ অধীনত মুঠ ৩৭ টা পকী পথৰো শুভ উদ্বোধন কৰা হয়। আনহাতে মলজাতীয় আৱৰ্জনাৰ পৰিশোধন প্ৰকল্পৰো উদ্বোধন কৰা হয়।
আজি নলবাৰী জিলা দিৱস উপলক্ষ্যে ঘগ্ৰাপাৰত উৰণ সেতুৰ শিলান্যাস কৰাৰ লগতে চহৰবাসীৰ বাবে বিশুদ্ধ খোৱাপানীৰ যোগান প্ৰকল্প, নলবাৰী চহৰত ত্ৰিশ হাজাৰ গছ পুলি ৰোপন কৰাৰ পৰিকল্পনাৰে আৰবান ফৰেষ্ট প্ৰকল্প, নতুন আৱৰ্ত ভৱন, অত্যাধুনিক ক্লক টাৱাৰ, হাইমাক্স স্মাৰ্ট ষ্ট্ৰীট লাইট, জলসম্পদ বিভাগৰ ত্ৰিশ কোটি টকাৰ প্ৰকল্পকে ধৰি ২০ টা প্ৰকল্পৰ শিলান্যাস কৰা হয়।
আজি এই ৫৭৬ কোটি টকীয়া প্ৰকল্পৰ বাৰ্তা লৈ নলবাৰীৰ গৰ্ডন উচ্চতৰ মাধ্যমিক বিদ্যালয়ৰ খেলপথাৰত উপস্থিত হোৱা মুখ্যমন্ত্ৰী হিমন্ত বিশ্ব শৰ্মাক সংগ দিয়ে স্থানীয় বিধায়ক তথা মন্ত্ৰী জয়ন্ত মল্ল বৰুৱা, জ্যেষ্ঠ মন্ত্ৰী চন্দ্ৰমোহন পাটোৱাৰী আৰু নাৰায়ণ ডেকাই।
ইপিনে সংবাদ মাধ্যমক সম্বোধন কৰি মুখ্যমন্ত্ৰী হিমন্ত বিশ্ব শৰ্মাই কয় যে কুমাৰ ভাস্কৰ বৰ্মা আমাৰ প্ৰাতঃস্মৰণীয় ব্যক্তি। আমাৰ জাতীয় নায়ক প্ৰাতঃস্মৰণীয় ব্যক্তিৰ কাৰণে আমি কাম কৰি যাম।
