দুভৰিৰ যাদুৰে কোটি কোটি ফুটবল প্ৰেমীৰ হৃদয় জয় কৰা বিশ্বৰ অন্যতম সফল ফুটবলাৰ ক্ৰিষ্টিয়ানো ৰ’নাল্ডোক হয়তো ভাৰতৰ ভূমিত খেলা দেখা যাব পাৰে। যদিহে ভাৰতলৈ খেলিব আহে তেন্তে ভাৰতত থকা কোটি-কোটি ৰ’নাল্ডো অনুৰাগীৰ বাবে ইয়াতকৈ ডাঙৰ আনন্দৰ খবৰ একোৱেই নহ’ব।
দৰাচলতে এ এফ চি চেম্পিয়নছ লীগ টুৰ ড্ৰ’ত ভাৰতৰ এফ চি গোৱা দলক ৰ’নাল্ডোৱে প্ৰতিনিধিত্ব কৰা ছৌদি আৰৱৰ ক্লাব আল নাছাৰৰ সৈতে গ্ৰুপ ডিত স্থান দিয়া হৈছে।
এ এফ চি চেম্পিয়নছ লীগ টুৰ ড্ৰ’ত ভাৰতৰ এফ চি গোৱা দলৰ উপৰি আল নাছাৰ, ইৰাকৰ আল জাৱৰা এফ চি আৰু তাজিকিস্তানৰ এফ চি ইষ্টিকলকো গ্ৰুপ ডিত স্থান দিয়া হৈছে।
যদি ক্রিষ্টিয়ানো ৰ’নাল্ডো সম্পূৰ্ণ সুস্থ হৈ থাকে তেন্তে তেওঁ এই মেচখন খেলিবলৈ ভাৰতলৈ অহাৰ সম্ভাৱনা আছে যদিও তেওঁৰ চুক্তিৰ এটা দফাই সমস্যা হিচাপে দেখা দিব পাৰে। চুক্তি অনুসৰি, তেওঁক যিকোনো প্রতিযোগিতাত বিদেশত অনুষ্ঠিত হোৱা মেচৰ বাবে যাত্ৰা কৰাত বাধা দিয়ে।
এ এফ চি চেম্পিয়নছ লীগ টু প্ৰতিযোগিতাত দলসমূহে বিদেশৰ মাটিৰ লগতে ঘৰুৱা খেলপথাৰতো মেচত অংশ ল’ব লাগিব।
উল্লেখ্য যে, এই প্ৰতিযোগিতাখনত মুঠ ৩২টা দলে অংশগ্ৰহণ কৰিছে, যিবোৰক ১৬টাকৈ পূব আৰু পশ্চিম জ’নত ভাগ কৰা হৈছে। ইয়াৰ পিছত সকলো দলকে চাৰিটাকৈ ৮টা গ্ৰুপত স্থান দিয়া হৈছে আৰু প্ৰতিটো গ্ৰুপৰ শীৰ্ষ ২টা দলে ৰাউণ্ড অৱ ১৬ত নিজৰ স্থান নিশ্চিত কৰিব।
এই প্ৰতিযগিতাখনৰ গ্ৰুপ ষ্টেজৰ মেচসমূহ অহা ১৬ ছেপ্তেম্বৰৰ পৰা ২৪ ডিচেম্বৰৰ ভিতৰত অনুষ্ঠিত হ’ব।
