হৰমুজ সংকটৰ মাজতে ৰাছিয়াৰ পৰা তেল ক্ৰয় কৰিবলৈ ভাৰতৰ ৰেহাই বৃদ্ধি কৰিছে আমেৰিকাই। ট্ৰাম্পৰ ট্ৰেজাৰী সচিব স্কট বেছাণ্টে আমেৰিকাই এই ৰেহাই বৃদ্ধি নকৰে বুলি কোৱাৰ দুদিন পিছতে ট্ৰাম্প প্ৰশাসনে এই সিদ্ধান্ত লৈছে। আমেৰিকাই এই ৰেহাই প্ৰায় ১ মাহৰ বাবে বৃদ্ধি কৰিছে।
এক প্ৰতিবেদন অনুসৰি, শুকুৰবাৰে গভীৰ নিশা আমেৰিকাৰ কোষাগাৰ বিভাগে এই অনুজ্ঞাপত্ৰ প্ৰদান কৰি ৰাছিয়াৰ তেল কঢ়িয়াই অনা জাহাজসমূহে ১৬ মে’লৈকে লেনদেন কৰিব পাৰিব। ট্ৰাম্পৰ কোষাগাৰ সচিব স্কট বেছাণ্টে এই ৰেহাই বৃদ্ধি কৰাৰ কোনো পৰিকল্পনা নাই বুলি ৰাজহুৱাভাৱে ইংগিত দিয়াৰ মাত্ৰ দুদিন পিছতে এই পদক্ষেপ লোৱা হৈছে। অৱশ্যে নিৰ্দিষ্ট চৰ্তত ক্ৰয় অব্যাহত ৰখাৰ অনুমতি দিলেও ইৰাণ, কিউবা আৰু উত্তৰ কোৰিয়াৰ সৈতে জড়িত লেনদেনসমূহ ইয়াত স্পষ্টভাৱে বাদ দিয়া হৈছে। অৰ্থাৎ এই ৰেহাইৰ অধীনত কোনো দেশেই ইৰাণ, কিউবা, উত্তৰ কোৰিয়াৰ পৰা তেল ক্ৰয় কৰিব নোৱাৰিব।
অৱশ্যে আমেৰিকাৰ এই পদক্ষেপক আমেৰিকাৰ সাংসদসকলে সমালোচনা কৰে। তেওঁলোকে যুক্তি দিছিল যে এই নিষেধাজ্ঞা ৰেহাই ইৰাণৰ অৰ্থনীতিত সহায় কৰিব, যিহেতু ইৰানে আমেৰিকাৰ সৈতে যুদ্ধত অৱতীৰ্ণ হৈছে। একেদৰে ৰাছিয়াৰ ওপৰত নিষেধাজ্ঞা প্ৰত্যাহাৰ কৰিলেও ইয়াৰ অৰ্থনীতিত সহায়ক হ’ব।
ৰাছিয়াৰ ৰাষ্ট্ৰপতিৰ বিশেষ দূত কিৰিল ডিমিট্ৰিয়েভে কয় যে, প্ৰথমটো ৰেহাইৰ ফলত ৰাছিয়াৰ ১০ কোটি বেৰেল খাৰুৱা তেল মুক্ত হ’ব, যিটো প্ৰায় এদিনৰ বিশ্বব্যাপী উৎপাদনৰ সমতুল্য। এই নিষেধাজ্ঞা সকাহৰ ফলত বিশ্বৰ তেলৰ যোগান সাময়িকভাৱে বৃদ্ধি পাব পাৰে যদিও ইৰাণে হৰমুজ জলদ্বীপ আংশিকভাৱে বন্ধ কৰাৰ ফলত পেট্ৰলিয়ামৰ মূল্য তীব্ৰভাৱে বৃদ্ধি পাইছে। কিয়নো যুদ্ধৰ পূৰ্বে বিশ্বৰ প্ৰায় ২০% তেল আৰু গেছ হৰমুজ জলদ্বীপৰ মাজেৰে পাৰ হৈ গৈছিল।
