অহা সপ্তাহত পাকিস্তানত অনুষ্ঠিত হ’বলগীয়া চাংহাই কো-অপাৰেচন অৰ্গেনাইজেশন (এছচিঅ’)ৰ বৈঠকত অংশগ্ৰহণ কৰিব ভাৰতৰ বৈদেশিক পৰিক্ৰমা মন্ত্ৰী এছ জয়শংকৰে। এই খবৰ প্ৰকাশ পোৱাৰ পিছতে এতিয়া সকলোৰে দৃষ্টি নিৱদ্ধ হৈ আছে অতি স্পষ্টবাদী তথা বাকপটু জয়শংকৰৰ ওপৰত।
উল্লেখ্য যে, অহা সপ্তাহত ইছলামবাদত অনুষ্ঠিত হ’বলগীয়া দুদিনীয়া বৈঠকত জয়শংকৰৰ উপৰি চীন আৰু ৰাছিয়াৰ প্ৰধানমন্ত্ৰীকে ধৰি অন্যান্য দেশৰ নেতাই অংশগ্ৰহণ কৰিব।
এই বৈঠকত অৰ্থনীতি, বাণিজ্য আৰু পৰিৱেশৰ লগতে সন্ত্ৰাসবাদ, আন্তঃৰাষ্ট্রীয় অপৰাধ বিষয়ক লৈ আলোচনা কৰা হ’ব। শনিবাৰে পাকিস্তানে এই তথ্য প্ৰদান কৰে।
পাকিস্তানৰ বৈদেশিক কাৰ্যালয়ে এক বিবৃতিত কয় যে অহা ১৫ আৰু ১৬ অক্টোবৰত এছচিঅ’ বৈঠক অনুষ্ঠিত হ’ব আৰু পাকিস্তানৰ প্ৰধানমন্ত্ৰী শ্বাহবাজ শ্বৰীফে এই শীৰ্ষ সন্মিলনখনৰ অধ্যক্ষতা কৰিব।
এছ চি অ’ৰ সদস্য ৰাষ্ট্ৰসমূহ অৰ্থাত চীন, ৰাছিয়া, বেলাৰুছ, কাজাখস্তান, কিৰ্গিস্তান, তাজিকিস্তান আৰু উজবেকিস্তানৰ প্ৰধানমন্ত্ৰীৰ লগতে ইৰাণৰ প্ৰথম উপ-ৰাষ্ট্ৰপতি আৰু ভাৰতৰ বৈদেশিক মন্ত্ৰীয়ে এই বৈঠকত অংশ ল’ব।
উল্লেখ্য যে, বিগত ৯ বছৰত প্ৰথমবাৰলৈ ভাৰতৰ কোনো মন্ত্ৰীয়ে পাকিস্তান ভ্ৰমণ কৰিব। সন্ত্ৰাসবাদী কাৰ্যকলাপৰ বাবে ভাৰত আৰু পাকিস্তানৰ মাজৰ সম্পৰ্কৰ অৱনতি ঘটিছিল। ইয়াৰ পিছৰে পৰা দুয়োখন দেশৰ মুৰব্বী নেতাৰ মাজত আনুষ্ঠানিক আলোচনা বা বৈঠক অনুষ্ঠিত হোৱা নাই।
