মহিলা টি-২০ বিশ্বকাপত ভাৰতীয় দলৰ ভাগ্য এতিয়া চিৰশত্ৰুৰূপে পৰিচিত পাকিস্তানৰ ওপৰত নিৰ্ভৰ। ভাৰতৰ চুবুৰীয়া ৰাষ্ট্ৰখনে আজি এখন অতি গুৰুত্বপূৰ্ণ মেচত মুখামুখি হ’ব নিউজিলেণ্ডৰ বিৰুদ্ধে। নিউজিলেণ্ডৰ বিৰুদ্ধে খেলিবলগীয়া আজিৰ মেচখনত যদি পাকিস্তান দলে জয়লাভ কৰে তেন্তে এই সন্মানীয় প্ৰতিযোগিতাখনৰ ছেমি ফাইনেলত প্ৰৱেশ কৰাৰ দুৱাৰ খোল খাব ভাৰতৰ।
উল্লেখ্য যে, ভাৰতীয় মহিলা দলটোৱে টুৰ্ণামেণ্টৰ অন্তিমখন লীগ মেচত অষ্ট্ৰেলিয়াৰ বিৰুদ্ধে পৰাস্ত হোৱাৰ বাবে ছেমি ফাইনেলত প্ৰৱেশৰ বাট প্ৰায় ৰুদ্ধ হৈ পৰিছিল।
ভাৰতে গ্ৰুপ এ’ৰ চাৰিখন মেচৰ দুখনত জয় আৰু সমসংখ্যক মেচত পৰাস্ত হৈ চাৰি পইণ্ট আৰু +০.৩২২ ৰানৰেটৰ সহায়ত তালিকাৰ দ্বিতীয় স্থানত আছে। সমসংখ্যক পইণ্ট তথা +০.২৮২ ৰানৰেটৰ সহায়ত তৃতীয় স্থানত আছে নিউজিলেণ্ড।
যদি আজিৰ মেচখনত নিউজিলেণ্ড জয়ী হয় তেন্তে অনায়াসে ছেমিত প্ৰৱেশ কৰিবলৈ সক্ষম হ’ব। অৱশ্যে যদি পাকিস্তানৰ হাতত নিউজিলেণ্ড পৰাস্ত হয় তেন্তে উন্নত ৰানৰেটৰ সহায়ত অন্তিম চাৰিত প্ৰৱেশ কৰিব ভাৰতে।
এই সমীকৰণৰ বাবেই সমগ্ৰ ভাৰতৰ ক্ৰিকেট অনুৰাগীয়ে আজিৰ মেচখনত চুবুৰীয়া পাকিস্তান দলক সমৰ্থন আগবঢ়োৱাৰ লগতে দলটো জয়ী হোৱাৰ বাবে প্ৰাৰ্থনা কৰিব।
