বৈদেশিক মন্ত্ৰী এছ জয়শংকৰে আজি চাংহাই কো-অপাৰেচন অৰ্গেনাইজেশন (এছচিঅ’)ৰ সন্মিলনত ভাগ ল’বলৈ পাকিস্তানত উপস্থিত হ’ব। বহু বছৰৰ পাছত এইটোৱেই হ’ব ভাৰতৰ প্ৰথমটো উচ্চ পৰ্যায়ৰ পাকিস্তান ভ্ৰমণ।
জয়শংকৰে আজি সন্ধিয়া ইছলামাবাদত উপস্থিত হোৱাৰ পিছত পাকিস্তানৰ প্ৰধানমন্ত্ৰী শ্বাহবাজ শ্বৰীফে এছ চি অ’ৰ সদস্য দেশৰ প্ৰতিনিধিৰ বাবে আয়োজন কৰা আদৰণি তথা নৈশ ভোজত অংশগ্ৰহণ কৰাৰ সম্ভাৱনা আছে।
উল্লেখ্য যে, ভাৰত আৰু পাকিস্তান দুয়োখন দেশেই ইতিমধ্যে স্পষ্ট কৰি দিছে যে এই সন্মিলনৰ সময়ত ভাৰতৰ বৈদেশিক পৰিক্ৰমা মন্ত্ৰী এছ জয়শংকৰ আৰু তেওঁৰ পাকিস্তানী সমকক্ষ ইছহাক দাৰৰ মাজত কোনো ধৰণৰ দ্বিপাক্ষিক আলোচনা নহ’ব।
প্ৰায় ৯ বছৰৰ পিছত এইবাৰ প্ৰথমবাৰৰ বাবে কোনো ভাৰতীয় বিদেশ মন্ত্ৰী পাকিস্তান ভ্ৰমণ কৰিব। ২০১৫ চনৰ ডিচেম্বৰ মাহত সুষমা স্বৰাজে শেষবাৰৰ বাবে পাকিস্তান ভ্ৰমণ কৰিছিল, য’ত তেওঁ আফগানিস্তান সম্পৰ্কীয় এখন সন্মিলনত অংশগ্ৰহণ কৰিছিল।
ভাৰতৰ বৈদেশিক মন্ত্ৰী জয়শংকৰে ২৪ ঘণ্টাতকৈও কম সময় অতিবাহিত কৰিব পাকিস্তানত। ইছলামাবাদত উপস্থিত হোৱাৰ পিছত জয়শংকৰে পাকিস্তানৰ প্ৰধানমন্ত্ৰী শ্বাহবাজ শ্বৰীফে এছ চি অ’ৰ সদস্য দেশৰ প্ৰতিনিধিৰ বাবে আয়োজন কৰা আদৰণি তথা নৈশ ভোজত অংশগ্ৰহণ কৰিব।
১৬ আৰু ১৭ অক্টোবৰত ইছলামাবাদত অনুষ্ঠিত হ’ব চাংহাই কো-অপাৰেচন অৰ্গেনাইজেশন (এছচিঅ’)ৰ বৈঠক।
উল্লেখ্য যে, ২০১৯ চনত পুলৱামা সন্ত্ৰাসবাদী আক্ৰমণ আৰু বালাকোটত হোৱা চাৰ্জিকেল ষ্ট্ৰাইকৰ পিছৰে পৰা ভাৰত-পাকিস্তানৰ সম্পৰ্কত ফাঁট মেলিছিল। ইয়াৰ পাছত ২০১৯ চনৰ আগষ্ট মাহত ভাৰতে জম্মু-কাশ্মীৰৰ বিশেষ মৰ্যাদা আঁতৰোৱাৰ সিদ্ধান্তই সম্পৰ্ক আৰু অধিক অৱনতি ঘটায়।
ইয়াৰ উপৰি, সন্ত্ৰাসবাদী কাৰ্যকলাপক প্ৰশ্ৰয় দিয়াৰ বাবেই ভাৰতে পাকিস্তানৰ সৈতে সম্পৰ্ক ৰখাৰ পৰা আঁতৰি আহিছে।
