ধলাইত মনোনয়ন প্ৰত্যাহাৰ কৰিব নিৰ্দলীয় প্ৰাৰ্থী অমিয় কান্তি দাসে। মুখ্যমন্ত্ৰী ড০ হিমন্ত বিশ্ব শৰ্মাৰ হস্তক্ষেপত মনোনয়ন প্ৰত্যাহাৰ কৰি পুনৰ বিজেপিলৈ উভতাৰ সিদ্ধান্ত অমিয় কান্তি দাসৰ।
বিজেপিৰ পৰা টিকট বঞ্চিত হোৱাৰ পিছতেই অমিয় কান্তি দাসে সাংসদ পৰিমল শুক্লবৈদ্যৰ বিৰুদ্ধে ক্ষোভ উজাৰি উপ-নিৰ্বাচনত নিৰ্দলীয়ৰূপে মনোনয়ন দাখিল কৰিছিল।
দাসে মনোনয়ন দাখিল কৰাৰ পিছতেই অস্বস্তিত পৰিছিল বিজেপি নেতৃত্ব। প্ৰাৰ্থিত্ব কেন্দ্ৰিক সংঘাত দূৰ কৰাৰ বাবে শনিবাৰে নিশা ফোনযোগে অমিয় কান্তি দাসক বুজনি দিয়ে মুখ্যমন্ত্ৰী হিমন্ত বিশ্ব শৰ্মাই।
মুখ্যমন্ত্ৰী শৰ্মাৰ নিৰ্দেশৰ পিছতেই আজি ৰাজ্য চৰকাৰৰ মন্ত্ৰী জয়ন্ত মল্ল বৰুয়া ধলাইত উপস্থিত হৈ অমিয় কান্তি আৰু তেওঁৰ সমৰ্থক সকলক বুজনি দিয়ে।
ধলাই নতুন বজাৰৰ মা মনসা বিবাহ ভৱনত অমিয় কান্তি আৰু সমৰ্থক সকলক লৈ বৈঠকত বহে মন্ত্ৰী জয়ন্ত মল্ল বৰুৱা, বিধায়ক কৌশিক ৰায়। প্ৰায় দুই ধন্টা বৈঠকৰ পাছত অমিয় কান্তিয়ে মনোনয়ন প্ৰত্যাহাৰৰ সিদ্ধান্ত গ্ৰহণ কৰে।
এই বৈঠকতে পুনৰবাৰ পৰিমল শুক্লবৈদ্যৰ বিৰুদ্ধে ক্ষোভ উজাৰিছে অমিয় কান্তি দাসসহ তেওঁৰ সমৰ্থক সকলে। পৰিমল শুক্লবৈদ্যৰ একনায়কত্বাৰ বাবে ধলাই বিজেপি ধ্বংস হ’বলৈ ধৰিছে বুলিও অভিযোগ কৰে দাসৰ সমৰ্থকসকলে৷
অমিয় কান্তি দাস আৰু তেওঁৰ সমৰ্থকসকলে উত্থাপন কৰা অভিযোগসমুহ গুৰুত্বসহকাৰে গ্ৰহণ কৰি দলৰ মজিয়াত অমিয় কান্তিক গুৰুত্বপূৰ্ণ স্থান দিয়াৰ লগতে ২৬ৰ বিধানসভা নিৰ্বাচনত প্ৰাৰ্থিত্ব প্ৰদান কৰা হ’ব বুলিও আশ্বাস দিয়া হয়।
সূত্ৰৰ পৰা লাভ কৰা খবৰ অনুসৰি দলৰ জিলা সভাপতি, শিলচৰ উন্নয়ন খণ্ডৰ চেয়াৰমেন অথবা কাছাৰ জিলা পৰিষদৰ চেয়াৰমেন, এই তিনটা পদৰ যি কোনো এটা পদ অমিয়ক প্ৰদান কৰাৰ সম্ভাৱনা আছে।
ইফালে আজি বিয়লি বিজেপি নেতৃত্বৰ সৈতে জিলা আয়ুক্ত কাৰ্যালয়লৈ গৈ অমিয় কান্তি দাসে মনোনয়ন পত্ৰ প্ৰত্যাহাৰ কৰিব।
