অহা ২৪ আৰু ২৫ নৱেম্বৰত চৌদি আৰৱৰ জেদ্দাত অনুষ্ঠিত হ’ব আই পি এল ২০২৫ৰ মেগা নিলাম। এইবাৰ মুঠ ১৫৭৪ জন খেলুৱৈয়ে পঞ্জীয়ন কৰিছিল। পঞ্জীয়ন কৰা খেলুৱৈসকলৰ ভিতৰত আছিল ১১৬৫জন ভাৰতীয় আৰু ৪০৯জন বিদেশী।
এতিয়া আই পি এল গভৰ্নিং কাউন্সিলে এই নিলামৰ বাবে নিৰ্বাচিত হোৱা ৫৭৪ গৰাকী খেলুৱৈৰ তালিকা প্ৰকাশ কৰিছে। অৰ্থাৎ ইতিমধ্যে ১০০০ গৰাকী ক্ৰিকেটাৰ নিলামৰ পৰা বাহিৰ হৈছে।
নিলামৰ বাবে নিৰ্বাচিত ৫৭৪ গৰাকী খেলুৱৈৰ ভিতৰত ১৩ বছৰীয়া ক্ৰিকেটাৰ এজনকো অন্তৰ্ভুক্ত কৰা হৈছে।
আই পি এল গভৰ্নিং কাউন্সিলে প্ৰকাশ কৰা নিলামৰ তালিকাত ৩৬৬ গৰাকী ভাৰতীয় আৰু ২০৮ গৰাকী বিদেশী খেলুৱৈৰ নাম সন্নিবিষ্ট কৰা হৈছে। ইয়াৰে এটা নাম হৈছে বিহাৰৰ সমস্তীপুৰৰ বৈভৱ সূৰ্যবংশীৰ নাম।
বৈভৱ সূৰ্য্যবংশীৰ বয়স মাত্ৰ ১৩ বছৰ। এই কম বয়সতে তেওঁ ৰঞ্জি ট্ৰফী, হেমন্ত ট্ৰফী, কোচ বিহাৰ ট্ৰফীৰ দৰে কেইবাটাও সন্মানজনক প্ৰতিযোগিতাত খেলিছে। শেহতীয়াকৈ তেওঁ ভাৰতীয় ১৯ বছৰ অনুৰ্ধ দলতো নিৰ্বাচিত হৈছিল। বৈভৱ সূৰ্যবংশীক লৈ দাবী কৰা হৈছে যে তেওঁ বিভিন্ন প্ৰতিযোগিতাকে ধৰি এবছৰত মুঠ ৪৯টা শতক অৰ্জন কৰিছে।
বৈভৱ সূৰ্যবংশীয়ে ৫ বছৰ বয়সৰ পৰাই ক্ৰিকেট খেলিবলৈ আৰম্ভ কৰিছিল। খবৰ অনুসৰি তেওঁৰ পিতৃ সঞ্জীৱে পাঁচ বছৰ বয়সৰ পৰাই বৈভৱক নেট প্ৰেকটিছ কৰিবলৈ আৰম্ভ কৰিছিল। ইয়াৰ বাবে পিতৃয়ে ঘৰতেই পিটচ তৈয়াৰ কৰি দিছিল।
ৰঞ্জি ট্ৰফীৰ যোৱা ছিজনত বিহাৰৰ হৈ অভিষেক ঘটোৱাৰ সুযোগ পাইছিল বৈভৱে। মাত্ৰ ১২ বছৰ আৰু ২৮৪ দিন বয়সতে প্ৰথম শ্ৰেণীৰ মেচ খেলিছিল বৈভৱে। একে সময়তে একে বছৰতে বিহাৰ ক্ৰিকেট সন্থাই আয়োজন কৰা ৰণধীৰ ভাৰ্মা অনূৰ্ধ্ব ১৯ এদিনীয়া প্ৰতিযোগিতাতো বৈভৱ সূৰ্যবংশীয়ে ত্ৰিশতক অৰ্জন কৰিছিল।
ইয়াৰ উপৰি যোৱা মাহত অষ্ট্ৰেলিয়া অনূৰ্ধ্ব ১৯ দলৰ বিৰুদ্ধে তেওঁ খেলিছিল চমকপ্ৰদ ইনিংছ। মাত্ৰ ৬৪টা বলত তেওঁ ১০৪ ৰানৰ শতকীয় ইনিংছ খেলিছিল। ইয়াৰ লগে লগে তেওঁ ১৯ বছৰ অনূৰ্ধ্ব টেষ্টত সৰ্বাধিক দ্ৰুত শতক অৰ্জন কৰা ভাৰতীয় বেটছমেন হিচাপেও পৰিগণিত হয়।
