পশ্চিম বংগৰ মুখ্যমন্ত্ৰী মমতা বেনাৰ্জীয়ে বৃহস্পতিবাৰে কেন্দ্ৰীয় চৰকাৰক আক্ৰমণ কৰি কয় যে, ৰাজ্য চৰকাৰক গৃহ নিৰ্মাণ আঁচনিৰ বাবে কেন্দ্ৰীয় চৰকাৰৰ পূঁজিৰ কোনো প্ৰয়োজন নাই। আচলতে মমতা বেনাৰ্জীয়ে কেন্দ্ৰীয় চৰকাৰে গৃহ নিৰ্মাণ আঁচনিৰ ক্ষেত্ৰত ৰাজ্য চৰকাৰৰ বিৰুদ্ধে বৈষম্যমূলক আচৰণ কৰাৰ অভিযোগ উত্থাপন কৰি এনেদৰে ক্ষোভ প্ৰকাশ কৰে।
মমতা বেনাৰ্জীয়ে উল্লেখ কৰে যে, বিগত তিনি বছৰত কেন্দ্ৰীয় চৰকাৰে গ্ৰাম্য গৃহ নিৰ্মাণ আঁচনিৰ বাবে কোনো ধৰণৰ পুঁজিৰ যোগান ধৰা নাই। এই আঁচনিখনত কেন্দ্ৰীয় চৰকাৰে ১০০ শতাংশ ধন প্ৰদান কৰে, কিন্তু এই আঁচনিৰ নাম প্ৰধানমন্ত্ৰী আৱাস যোজনা বুলি উল্লেখ কৰে।
ৰাজ্য চৰকাৰে ৪০ শতাংশ ধন দিয়ে, তথাপিও এই আঁচনি ৰূপায়ণৰ বাবে কেন্দ্ৰীয় চৰকাৰে ৰাজ্য চৰকাৰসমূহৰ ওপৰত বিভিন্ন চৰ্ত আৰোপ কৰে। কেন্দ্ৰীয় চৰকাৰক আক্ৰমণ কৰি মমতাই কেন্দ্ৰীয় চৰকাৰক লক্ষ্য কৰি উল্লেখ কৰে যে, কেন্দ্ৰই ৰাজ্য চৰকাৰক উচিত ধন প্ৰদান নকৰে, কিন্তু নিশ্চিতভাৱে ইয়াৰ জৰিয়তে ৰাজনীতি কৰে।
মুখ্যমন্ত্ৰী মমতাই লগতে কয় যে, কেন্দ্ৰীয় চৰকাৰৰ সহায় অবিহনে বংগ চৰকাৰে ৫০ লাখৰো অধিক লোকৰ বাবে গৃহ নিৰ্মান কৰিছে। মুখ্যমন্ত্ৰীয়ে কয় যে, বৰ্তমান বংগত ৩৬ লাখ মাটিৰ ঘৰ আছে, কিন্তু অতি সোনকালে সকলোৱে পকী ঘৰ লাভ কৰিব। লগতে তেওঁ কয় যে, ডিচেম্বৰ মাহত ১২ লাখ লোকৰ একাউণ্টলৈ ঘৰ নিৰ্মাণৰ বাবে ধন প্ৰেৰণ কৰিব। বাকী ২৪ লাখ ঘৰ ২-৩ বছৰৰ ভিতৰতে নিৰ্মাণ কৰিব।
মুখ্যমন্ত্ৰী মমতা বেনাৰ্জীয়ে কয় যে, ৰাজ্য চৰকাৰৰ ধনেৰে নিৰ্মাণ কৰা গৃহবোৰ কেৱল ‘বাংলাৰ বাৰী’ নামেৰেহে পৰিচিত হ’ব।
মুখ্যমন্ত্ৰী মমতাই তেওঁৰ লক্ষ্মী ভাণ্ডাৰ যোজনা আঁচনিৰ প্ৰশংসা কৰি কয় যে, এই আঁচনিৰ অধীনত পাঁচ লাখ সাত হাজাৰ মহিলাক অন্তৰ্ভুক্ত কৰা হৈছে। ইয়াৰ বাবে ৰাজ্য চৰকাৰে বছৰি ৬২৫ কোটি টকা অতিৰিক্ত ব্যয় কৰিব। ডিচেম্বৰৰ পৰা এই মহিলাসকলে ধন লাভ কৰিবলৈ আৰম্ভ কৰিব বুলি মন্তব্য কৰে মুখ্যমন্ত্ৰীয়ে। তেওঁ কয় যে এই আঁচনিখনত যোগদানৰ বাবে প্ৰায় ২৪ হাজাৰ মহিলাই আবেদন কৰিছে।
