বৃহস্পতিবাৰে ছত্তীশগড়ৰ বিজাপুৰত দুজন গাঁও প্ৰধানৰ মৃতদেহ উদ্ধাৰ হোৱা ঘটনাই তীব্ৰ চাঞ্চল্যৰ সৃষ্টি কৰিছে। বুধবাৰে মাওবাদীয়ে গাঁও প্ৰধান দুজনক অপহৰণ কৰি হত্যা কৰাৰ অভিযোগ উত্থাপন হৈছে।
জানিব পৰা অনুসৰি বৃহস্পতিবাৰে পুৱা সুখলু ফৰছা আৰু সুখৰাম অৱলম নামৰ গাঁও প্ৰধান দুজনৰ মৃতদেহ বেলেগ বেলেগ স্থানত উদ্ধাৰ হৈছিল। ফৰছাৰ এগৰাকী কন্যাই কালি নিশা এটা ভিডিঅ’ৰ জৰিয়তে তেওঁৰ পিতৃক এৰি দিবলৈ কাতৰ অনুৰোধ জনাইছিল। কিন্তু এই ভিডিঅ’ প্ৰকাশ পোৱাৰ এদিন পিছতেই ডিঙি কটা অৱস্থাত উদ্ধাৰ হয় তেওঁৰ মৃতদেহ।
সুখলু ফৰছাৰ মৃতদেহৰ পৰা আৰক্ষীয়ে উদ্ধাৰ কৰিছে মাওবাদীয়ে প্ৰদান কৰা এখন ভাবুকিভৰা পত্ৰ। পত্ৰখনত স্পষ্টৰূপত উল্লেখ কৰিছে যে তেওঁক কেইবাবাৰো বিজেপিৰ সৈতে সম্পৰ্ক চ্ছেদ কৰিব কোৱা হৈছিল কিন্তু তেওঁ এই কথা নুশুনিলে।
উল্লেখ্য যে, ২০২৩ বৰ্ষৰ ফেব্ৰুৱাৰী মাহৰ পৰা এতিয়ালৈকে বস্তৰত বিজেপিৰ ১১গৰাকী আৰু কংগ্ৰেছৰ তিনিজন নেতা-কৰ্মীক হত্যা কৰা হৈছে। মাওবাদীয়ে বিজেপিৰ নেতা-কৰ্মীসকলক স্পষ্টৰূপত সকীয়নি প্ৰদান কৰিছে যে যদিহে তেওঁলোকে দল ত্যাগ নকৰে তেন্তে তেওঁলোকক হত্যা কৰা হ’ব।
মাওবাদীৰ তৰফৰ পৰা লাভ কৰা ভয়-ভাবুকিৰ প্ৰতি লক্ষ্য ৰাখি চলিত বছৰৰ মাৰ্চ মাহত প্ৰায় ৪৩ গৰাকী বিজেপি নেতা-কৰ্মীক আৰক্ষীৰ তৰফৰ পৰা নিৰাপত্তা প্ৰদান কৰা হৈছিল। শেহতীয়াভাৱে হত্যাৰ বলি হোৱা সুখলু ফৰছা ২০০৪ৰ পৰা ২০০৯ চনলৈ আডবাড়া-বিৰিয়াভূমি গাঁৱৰ প্ৰধান আছিল আৰু ভৈৰমগড়ত বিজেপিৰ কিষাণ মৰ্চাৰ মণ্ডল পৰ্যায়ৰ নেতাৰ দায়িত্বও পালন কৰিছিল।
