ছত্তীশগড়ৰ বালোদ জিলাত এখন তীব্ৰবেগী বিলাসী বাহনে ৰাজপথত ৰৈ থকা এখন ট্ৰাকক খুন্দিওৱাৰ ফলত ৬ জন লোকৰ মৃত্যু হয় আৰু আন ৭ জন লোক গুৰুতৰভাৱে আহত হয়। সোমবাৰে আৰক্ষীয়ে এই তথ্য প্ৰদান কৰে।
এক পাৰিবাৰিক অনুষ্ঠানত অংশগ্ৰহণ কৰিবলৈ যোৱাৰ সময়তে এই দুৰ্ঘটনাটো সংঘটিত হয়। মৃতসকলৰ ভিতৰত আছে চাৰিগৰাকী মহিলা।
দুৰ্ঘটনা সন্দৰ্ভত এজন আৰক্ষী বিষয়াই কয়, ‘বাহনখনে ট্ৰাকৰ পিছ অংশত খুন্দা মাৰে। এছ ইউ ভিখনত যাত্ৰা কৰা ১৩ জন লোকৰ ভিতৰত ৬ জন লোকৰ থিতাতে মৃত্যু হয়। আনহাতে ৭ জন গুৰুতৰভাৱে আহত হয়।’
দুৰ্ঘটনা সংঘটিত হোৱাৰ পিছতে ঘটনাস্থলত এক অবৰ্ণনীয় পৰিৱেশৰ সৃষ্টি হয় আৰু ওচৰে পাজৰে থকা লোকসকলে উদ্ধাৰৰ কাম আৰম্ভ কৰে। ইয়াৰ পিছতে আৰক্ষীয়ে সেই স্থানত উপস্থিত হৈ আহত লোকসকলক চিকিৎসালয়লৈ প্ৰেৰণ কৰে। দুৰ্ঘটনাত মৃত্যু হোৱা লোকসকলক মৰণোত্তৰ পৰীক্ষাৰ বাবে প্ৰেৰণ কৰা হৈছে।
বিষয়াসকলৰ মতে আহতসকলৰ ভিতৰত আছে ৫ গৰাকী মহিলা আৰু এটা শিশু। সেই লোকসকলক স্থানীয় চিকিৎসালয়ত ভৰ্তি কৰা হৈছিল। কিন্তু অৱস্থা সংকটজনক হোৱাত তেওঁলোকক উন্নত চিকিৎসাৰ বাবে ৰাজনান্দগাঁও জিলা চিকিৎসালয়ত ভৰ্তি কৰোৱা হৈছে।
ইফালে আৰক্ষীয়ে নিজাববীয়াকৈ এই পথ দুৰ্ঘটনাৰ গোচৰ ৰুজু কৰি তদন্ত অব্যাহত ৰাখিছে।
