ভাৰত-বাংলাদেশ সীমান্তত পুনৰ এক উত্তেজনাপূৰ্ণ পৰিস্থিতিৰ সৃষ্টি হৈছে। সীমান্ত সুৰক্ষা বাহিনী (BSF) আৰু সীমান্তৰক্ষী বাংলাদেশে (BGB) অনুপ্ৰৱেশৰ সুবিধা প্ৰদান কৰা আৰু অবৈধভাৱে মানুহক সীমান্ত পাৰ হৈ ঠেলি দিয়াৰ গুৰুতৰ অভিযোগ উত্থাপন কৰিছে।
এই উত্তেজনাৰ মাজতে সীমান্তৰ ন’-মেন ভূমিত আৱদ্ধ হৈ আছে শিশু-মহিলাকে ধৰি কেইবাডজন লোক। ৰাজ্যখনত অবৈধভাৱে বসবাস কৰা বাংলাদেশী নাগৰিকসকলক চিনাক্ত কৰি বিতাড়িত কৰাৰ বাবে পশ্চিম বংগ চৰকাৰে কেইবাটাও কঠোৰ ব্যৱস্থা গ্ৰহণ কৰাৰ সময়তে এই ষ্টেণ্ডঅফ।
বাংলাদেশ সীমান্ত সুৰক্ষা বাহিনীয়ে ৫ জুনত আনুষ্ঠানিক বিবৃতি প্ৰকাশ কৰি দাবী কৰে যে, ভাৰতীয় সীমান্ত সুৰক্ষা বাহিনীয়ে ৪ আৰু ৫ জুনৰ পুৱতি নিশা কেইবাবাৰো বাংলাদেশৰ ভূখণ্ডত মানুহক ঠেলি দিবলৈ চেষ্টা কৰিছিল। তথ্য অনুসৰি, পশ্চিম বংগৰ কোচবিহাৰ জিলাৰ সমীপৰ লালমনিৰহাট আৰু পঞ্চগড়, দক্ষিণ দিনাজপুৰ আৰু মালদাৰ সমীপৰ নগাঁও, মালদা আৰু মুৰ্ছিদাবাদৰ সমীপৰ চপাইনাবাবগঞ্জ আদি সীমান্তৱৰ্তী অঞ্চলত বিগত ২৪ ঘন্টাত এনে কেইবাটাও ঘটনা সংঘটিত হৈছে।
শূন্য লাইনত বাংলাদেশত প্ৰৱেশ কৰা ৭০ৰো অধিক লোকক বাধা দিয়া বুলি দাবী কৰিছে BGB য়ে। বিজিবিৰ ১৫ নং লালমনিহাট বেটেলিয়নৰ কামাণ্ডিং অফিচাৰ লেফটেনেণ্ট কৰ্ণেল মেহেন্দী ইমামে কয় যে, এই লোকসকল বৰ্তমান তাত আৱদ্ধ হৈ আছে। তথ্য অনুসৰি, ৫ জুনৰ পুৱা নগাঁৱত ৫টা শিশুসহ ১৭ জন লোকক ৰখাই দিয়া হয়। লালমণিৰহাটৰ হাতীবন্ধা, পাটগ্ৰাম, আৰু আদিত্যমাৰীৰ তিনিটা অঞ্চলত ৩৩ জন লোকক ৰখাই দিয়া হয়। ইফালে, ৪ জুনৰ পুৱা চপাইনাবাবগঞ্জৰ শূন্য লাইনত ১০ গৰাকী মহিলা আৰু ৬ গৰাকী শিশুসহ ২৮ জন লোকক ৰখাই দিয়া হয়।
ভাৰতীয় সীমান্ত সুৰক্ষা বাহিনীয়ে BGBৰ অভিযোগ নাকচ কৰি সম্পূৰ্ণ বেলেগ দাবী উত্থাপন কৰিছে। ৫ জুনত BSFয়ে কয় যে, কোচবিহাৰৰ মেখলীগঞ্জ অঞ্চলৰ পানীশালাত মহিলা আৰু শিশুকে ধৰি ১০ জন বাংলাদেশী নাগৰিকক অবৈধভাৱে ভাৰতলৈ সৰবৰাহ কৰাৰ চেষ্টা BGBয়ে বিফল কৰিছে। বিষয়টোৰ সংবেদনশীলতাক লক্ষ্য কৰি BSFয়ে ততাতৈয়াকৈ সেই অঞ্চলত অতিৰিক্ত সৈন্য মোতায়েন কৰে, যাতে কোনো লোক ভাৰতত পাৰ হ’ব নোৱাৰে। এই ঘটনাৰ এটা ভিডিঅ’ও ছ’চিয়েল মিডিয়াত প্ৰকাশ পাইছে, য’ত BSF আৰু BGBৰ জোৱানসকলে সীমান্তত আৱদ্ধ হৈ থকা একাংশ লোকৰ সৈতে এই বিষয়ত আলোচনা কৰি থকা দেখা গৈছে।
এই দুয়োটা দলে এই ১০ জন লোকক নিজৰ নাগৰিক বুলি স্বীকাৰ কৰিবলৈ অস্বীকাৰ কৰাৰ ফলত তেওঁলোকে গৰম ৰ’দ আৰু অসুৰক্ষিত পৰিস্থিতিত সীমান্তত আৱদ্ধ হৈ থাকিব লগা হৈছে। পৰিস্থিতি সমাধানৰ বাবে BSFয়ে পতাকা বৈঠক আহ্বান কৰাৰ চেষ্টা চলাইছিল, যদিও খবৰ অনুসৰি BGBয়ে উপস্থিত থাকিবলৈ অস্বীকাৰ কৰে। ইয়াৰ পিছতে BSFয়ে সীমান্তত টহল যথেষ্ট তীব্ৰতৰ কৰি তুলিছে।
এই শেহতীয়া সীমা বিবাদৰ মাজতে অতি সোনকালে দুয়োখন দেশৰ শীৰ্ষ নিৰাপত্তাৰক্ষীৰ মুখামুখি হ’ব। পূৰ্বৰ নিৰ্ধাৰিত অনুযায়ী ৫৭ সংখ্যক ভাৰত-বাংলাদেশ সীমান্ত সমন্বয় বৈঠক ৮ জুনৰ পৰা ১১ জুনলৈ নতুন দিল্লীত অনুষ্ঠিত হোৱাৰ কথা।শূন্য লাইনত আৱদ্ধ হৈ থকা লোকৰ বিষয় আৰু অনুপ্ৰৱেশৰ অভিযোগ এই বৈঠকত এক উত্তপ্ত বিষয় হ’ব বুলি আশা কৰা হৈছে।
