পাকিস্তানৰ পৰা সঞ্চালিত হৈ থকা সন্ত্ৰাসবাদীৰ ঘাটীত ভাৰতে চলোৱা এয়াৰ ষ্ট্ৰাইক সন্দৰ্ভত আজি নতুন দিল্লীৰ সংসদ ভৱনত অনুষ্ঠিত হয় সৰ্বদলীয় বৈঠক। এই সৰ্বদলীয় বৈঠকত প্ৰায় প্ৰতিটো বিৰোধী দলৰে শীৰ্ষ পৰ্যায়ৰ নেতাসকল উপস্থিত থাকে।
এই বৈঠকত কেন্দ্ৰীয় চৰকাৰৰ হৈ প্ৰতিৰক্ষা মন্ত্ৰী ৰাজনাথ সিং, গৃহ মন্ত্ৰী অমিত শ্বাহ, কিৰেন ৰিজিজুৰ লগতে বিৰোধীৰ হৈ কংগ্ৰেছ নেতা ৰাহুল গান্ধী, মল্লিকাৰ্জুন খৰ্গে, তৃণমূল কংগ্ৰেছৰ সুন্দীপ মুখাৰ্জী, এআইএমআইএম প্ৰধান তথা সাংসদ আছাদুদ্দিন ওৱেছিৰ লগতে আন কেইবাজনো নেতা উপস্থিত থাকে।
সৰ্বদলীয় বৈঠকৰ পিছতে সংসদীয় পৰিক্ৰমা মন্ত্ৰী কিৰেন ৰিজিজুৱে সংবাদ মাধ্যমৰ আগত কয় যে অপাৰেশ্যন সিন্দুৰৰ বিষয়ে প্ৰতিটো ৰাজনৈতিক দলক অৱগত কৰাব বিচাৰিছিল চৰকাৰে। অপাৰেশ্যন সিন্দুৰ এতিয়াও অব্যাহত আছে।
বুধবাৰে মাজ নিশা পাকিস্তান আৰু পাক অধিকৃত কাশ্মীৰৰ ৯টাকৈ সন্ত্ৰাসবাদীৰ ঘাটীত চলোৱা আক্ৰমণত ১০০ৰো অধিক উগ্ৰপন্থী সদস্য নিহত হোৱাৰ লগতে ভাৰতীয় সেনাই সন্ত্ৰাসবাদীৰ কেইবাটাও ঘাটী ধ্বংস কৰি দিয়া বুলি কিৰেন ৰিজিজুৱে মন্তব্য কৰে।
ৰিজিজুৱে লগতে কয় যে প্ৰতিৰক্ষা মন্ত্ৰী ৰাজনাথ সিঙৰ অধ্যক্ষতাত অনুষ্ঠিত বৈঠকতেই তেওঁ অপাৰেশ্যনৰ বিষয়ে জানিব দিয়ে।
ইফালে, বৈঠকত উপস্থিত থকা বিৰোধীয়ে এই বৈঠকক ইতিবাচক আখ্যা দিয়াৰ লগতে ভাৰত চৰকাৰৰ সকলো পদক্ষেপৰ সৈতে একেলগে আছে বুলিও মন্তব্য কৰে।
আনহাতে বৈঠকৰ অন্তত আছাদুদ্দিন ওৱেছিয়ে সন্ত্ৰাসবাদক আশ্ৰয় দিয়া পাকিস্তানক ক্ষুৰধাৰ সমালোচনা কৰাও দেখা যায়।
