জুলাই মাহ সমাপ্ত হ’বলৈ মাজত মাথে দুটা দিন বাকী। পহিলা আগষ্টৰ পৰা দেশজুৰি সলনি হ’ব কেইবাটাও নিয়ম। সলনি হোৱা নিয়ম সন্দৰ্ভত দেশৰ জনতাৰ ওপৰত পৰিব প্ৰভাৱ। ঘৰুৱা চিলিণ্ডাৰ, ক্ৰেডিট কাৰ্ড আদি ক্ষেত্ৰত পৰিব প্ৰভাৱ।
জানো আহক কি কি ক্ষেত্ৰত প্ৰভাৱ পৰিব দেশৰ জনতাৰ ওপৰত
সলনি হ’ব এলপিজি চিলিণ্ডাৰৰ দাম
প্ৰতিটো মাহৰ আৰম্ভণিতে এলপিজি চিলিণ্ডাৰৰ দামৰ পৰিৱৰ্তন হয়। জুলাই মাহতো চৰকাৰে ১৯ কিলো ওজনৰ বাণিজ্যিক চিলিণ্ডাৰৰ দামৰ পৰিৱৰ্তন কৰিছিল। এইক্ষেত্ৰত আগষ্ট মাহতো চিলিণ্ডাৰৰ দামৰ পৰিৱৰ্তন হোৱাৰ পূৰ্ণ সম্ভাৱনা আছে।
১৩ দিন বন্ধ থাকিব বেংক
ভাৰতীয় ৰিজাৰ্ভ বেংক (আৰবিআই) অফিচিয়েল ৱেবছাইটত দিয়া তথ্য অনুসৰি, আগষ্টত মুঠ ১৩ দিন বেংক বন্ধ থাকিব। এনে পৰিস্থিতিত যদি বেংক সম্পৰ্কীয় আপোনাৰ কাম থাকে তেন্তে বেংকলৈ যোৱাৰ পূৰ্বে বেংকৰ বন্ধৰ তালিকাখন চাই ল’ব।
আইটিআৰ দাখিল কৰাৰ বাবে জৰিমনা
আপুনি ৩১ জুলাই ২০২৪ৰ ভিতৰত আপোনাৰ আয়কৰ ৰিটাৰ্ণ দাখিল নকৰে তেন্তে আপুনি জৰিমনা ভৰিব লাগিব। ৩১ ডিচেম্বৰ ২০২৪ৰ ভিতৰত বিলম্বিত ৰিটাৰ্ণ দাখিল কৰাৰ সুযোগ প্ৰদান কৰা হ’ব।
অৱশ্যে, আপুনি আপোনাৰ উপাৰ্জন অনুসৰি বিলম্বিত আইটিআৰ দাখিলৰ ওপৰত জৰিমনা পৰিশোধ কৰিব লাগিব। যদি আপোনাৰ উপাৰ্জন ৫ লাখ টকা হয় তেন্তে ১০০০ টকা জৰিমনা আৰু যদি উপাৰ্জন ৫ লাখ টকাতকৈ অধিক হয় তেন্তে আইটিআৰ পলমকৈ দাখিল কৰাৰ বাবে জৰিমনা ৫,০০০ টকালৈ হ’ব।
গুগল মেপত পৰিৱৰ্তন
গুগল মেপে ভাৰতত এটা ডাঙৰ পৰিৱৰ্তন আনিছে। ১ আগষ্টৰ পৰা কোম্পানীটোৱে ইয়াৰ সেৱা মাচুল ৭০% হ্ৰাস কৰিছে যাতে অধিকসংখ্যক অংশীদাৰে যোগদান কৰিব পাৰে। সাধাৰণ ব্যৱহাৰকাৰীসকলে কোনো নতুন মাচুল পৰিশোধ কৰিব নালাগে। এই নিয়মৰ বাবে গুগল মেপৰ দৈনিক ব্যৱহাৰৰ ওপৰত কোনো প্ৰভাৱ নপৰে।
এইচ.ডি.এফ.চি. বেংকৰ ক্ৰেডিট কাৰ্ডত অতিৰিক্ত মাচুল
এইচডিএফচি বেংকৰ ক্ৰেডিট কাৰ্ডৰ নিয়ম আগষ্টৰ পৰা সলনি হ’ব। ক্ৰেডিট কাৰ্ড ব্যৱহাৰ কৰি ৫,০০০ টকাতকৈ অধিক মূল্যত পেট্ৰ’ল-ডিজেল ভৰালে ১% মাচুল পেনাল্টি লগোৱা হ’ব।
আনহাতে, ৫০,০০০ টকাৰ অধিক বিল পৰিশোধ কৰাৰ বাবে ১% মাচুল লোৱা হ’ব। বেংকে পলমকৈ পৰিশোধ আৰু সহজ ইএমআইৰ বাবে মাচুল বৃদ্ধি কৰিছে। অতিৰিক্ত মাচুল প্ৰতিবাৰেই ৩০০০ টকাৰ অধিক নহ’ব।
