মাত্ৰ ১৩ বছৰ বয়সতে হৈছিল অপহৰণ, তাৰপাছত পালেগৈ বিহাৰ। ১৬ বছৰ বয়সলৈকে বন্দুকো চলাবলৈ শিকিলে। নিজৰ সন্তানৰ বাবে কৰিলে আত্মসমৰ্পন, তাৰপাছত বলীউড, ৰাজনীতিৰ পৰা বিগ বছলৈ যাত্ৰা। এই কাহিনী হৈছে চম্বলপুৰৰ এগৰাকী বিৰাংগনাৰ কাহিনী।
চম্বল উপত্যকাত একাধিক ভয়ংকৰ ডকাইটিৰ ঘটনা সংঘটিত হৈছিল। ইয়াৰে কিছুসংখ্যক মহিলাও আছিল। যাৰ নাম শুনিয়েই ইয়াৰ চাৰিওকাষৰ অঞ্চলত আতংকৰ সৃষ্টি হৈছিল। বলীউডেও চম্বলৰ এই ডকাইতিৰ ওপৰত ইতিমধ্যে বহুকেইখন চলচ্চিত্ৰ নিৰ্মাণ কৰিছে।
ইয়াৰ ভিতৰত এখন হৈছে Wounded- The Bandit Queen, য’ত চম্বলৰ এইগৰাকী দস্যু সুন্দৰীয়ে নিজেই অভিনয় কৰিছিল। তেওঁ চম্বল উপত্যকাৰ দস্যুৰাণী ফুলনদেৱীৰ পাছত দ্বিতীয়গৰাকী মহিলা ডকাইত আছিল। তেওঁৰ এই কাহিনী আছিল একেবাৰে চলচ্চিত্ৰৰ কাহিনীৰ দৰে।
তেওঁৰ নাম হৈছে সীমা পৰিহাৰ। উত্তৰ প্ৰদেশৰ ঔৰৈয়া জিলাৰ ববাইন গাঁৱত শিৰোমণি সিঙৰ ঘৰত তেওঁ জন্মগ্ৰহণ কৰিছিল। সকলো পিতৃৰ দৰে শিৰোমণি সিঙেও নিজৰ জীয়ৰীক পঢ়াই-শুনাই এগৰাকী ভাল মানুহ কৰিব বিচাৰিছিল। কিন্তু কয় নহয় মানুহে হাজাৰ চেষ্টা কৰিলেও নিজৰ ভাগ্যৰ সন্মুখত সকলো অসহায়। ঠিক তেনেকুৱাই হৈছিল সীমা পৰিহাৰৰ লগতো।
সীমা পৰিহাৰে ববাইন গাঁৱত নিজৰ পিতৃ-মাতৃ, চাৰি ভনী আৰু দুই ভাতৃৰ লগত সুখেৰে বাস কৰিছিল। কিন্তু নিয়তিৰ কি পৰিহাস! ১৩বছৰ বয়সতে তেওঁৰ জীৱনলৈ নামি আহিছিল গভীৰ অমানিশা। তেওঁক নিজৰ ঘৰৰ পৰাই এটি ডকাইতৰ দলে অপহৰণ কৰি নিয়ে। দলটোত এগৰাকী মহিলা ডকাইতো আছিল।
ডকাইত লালা ৰামৰ দলে সীমা পৰিহাৰক বিহাৰলৈ লৈ যায়। সীমাই বহুবাৰ ডকাইত দলৰ পৰা পলায়লৰ চেষ্টা কৰে যদিও ব্যৰ্থ হয়। ডকাইত লালা ৰামে নিজৰ দলৰ সদস্যক কৈ থৈছিল যে যদিহে সীমাই পলাই যোৱাৰ চেষ্টা চলাই লগে লগে যেন তেওঁক গুলীয়াই মাৰি পেলায়।
অৱশেষত সীমাই বিহাৰত থাকিবলৈ বাধ্য হয় আৰু ডকাইটিৰ কৌশল শিকিবলৈ লয়। ১৬ বছৰ বয়সতে সীমাই চম্বলৰ বিহাৰত বন্দুক চলাবলৈ শিকে। বহু সময়ত সীমাই ডকাইত দলৰ লগত লগ হৈ আৰক্ষীৰ সৈতেও যুদ্ধত লিপ্ত হয়।
লালা ৰামৰ সৈতে একেটা দলতে থকা ডকাইত নিৰ্ভয় গুঞ্জৰৰ সৈতে সীমাই বিবাহ পাশত আৱদ্ধ হয়। ১৯৯৯ চনত তেওঁ এটি ল’ৰা সন্তানৰ মাতৃ হয়। পুত্ৰৰ মাতৃ হোৱাৰ এমাহ পাছতেই আৰক্ষীৰ সৈতে হোৱা সংঘৰ্ষত লালা ৰামৰ মৃত্যু হয়।
ডকাইত লালা ৰামৰ মৃত্যুৰ পাছত সীমাই নিজৰ পুত্ৰৰ প্ৰাণ ৰক্ষা কৰিবলৈ আৰক্ষীৰ ওচৰত আত্মসমৰ্পণ কৰে। সীমাই প্ৰায় তিনি বছৰলৈকে ইতাৱাৰ জে’লত বন্দী হৈ থকাৰ পাছত জামিনত মুকলি হৈ নিজৰ পুত্ৰৰ সৈতে থাকিবলৈ লয়।
ইতাৱাৰ জে’লৰ পৰা মুক্ত হোৱাৰ পাছত সীমাই ৰাজনীতিতো নিজৰ ভাগ্য পৰীক্ষা কৰে। কিন্তু তাত তেওঁ সফল হ’ব নোৱাৰে। তাৰপাছত তেওঁ ২০১০ চনত “বিগ বছ”ত অংশগ্ৰহণ কৰে, য’ত তেওঁ নিজৰ প্ৰভাৱশালী ব্যক্তিত্বৰ দ্বাৰা সকলো দৰ্শকৰে হৃদয় জয় কৰিবলৈ সক্ষম হয়।
২০১১ ৰ পৰা তেওঁ এগৰাকী সমাজকৰ্মী হিচাপে মানৱ সেৱা আগবঢ়াই আহিছে।
